Politics : महापालिकेच्या निवडणुका तोंडावर असताना राष्ट्रवादी अजित पवार गटाच्या नेत्या रुपाली ठोंबरे पाटील यांनी भाजपवर जोरदार हल्लाबोल केला आहे. पुणे महापालिकेच्या राजकारणात सध्या चांगलीच रणधुमाळी सुरू असून, या पार्श्वभूमीवर त्यांनी खासदार आणि केंद्रीय मंत्री मुरलीधर मोहोळ यांच्यावर थेट आरोप केले आहेत.
रुपाली ठोंबरे पाटील म्हणाल्या की, राज्यात आम्ही सगळे महायुतीत आहोत, पण महापालिकेच्या निवडणुकीसाठी भाजप, राष्ट्रवादी आणि शिवसेना वेगवेगळे लढत आहेत. त्यामुळे आरोप-प्रत्यारोप होणारच. मात्र सुरुवात भाजपकडून झाली. मुरलीधर मोहोळ यांनी अजित पवारांवर टीका केली नसती, तर आम्हालाही बोलायची गरजच पडली नसती, असं त्या म्हणाल्या. (Politics)
“मुरली अण्णा आज खासदार आणि केंद्रीय मंत्री झालेत, पण अजित पवार गेली ४० वर्ष राज्याचं राजकारण करतायत. त्यामुळे वडीलधाऱ्या माणसासारखं वागणं अपेक्षित आहे,” असा टोला त्यांनी लगावला. अजित पवारांनी गुन्हेगारीवर नियंत्रण ठेवण्यासाठी पोलीस आयुक्तांना कडक आदेश दिले आहेत. त्यामुळे मोहोळ यांनी आमच्यावर आरोप करण्याआधी स्वतःच्या गिरेबानात डोकावून पाहावं, असंही त्या म्हणाल्या.
“स्वतः खालचा अंधार झाकून ठेवून आमच्यावर बोट दाखवायचं, हे चुकीचं आहे. निवडणुका आल्या की विनाकारण अजित पवारांवर आरोप केले जातात. राष्ट्रवादीने कधीही शिक्षा झालेल्या गुन्हेगारांना तिकीट दिलं नाही. पण भाजपाने ज्यांना तिकीट दिलंय, ते फरार आरोपी आहेत. त्यावर मुरली अण्णा कधी बोलणार?” असा सवालही त्यांनी उपस्थित केला.
“एक बोट आमच्याकडे दाखवत असाल, तर चार बोटं तुमच्याकडे आहेत, हे लक्षात ठेवा,” असं म्हणत त्यांनी जोरदार टीका केली.
रवींद्र चव्हाण यांच्यावर बोलताना रुपाली ठोंबरे म्हणाल्या की, “आता अचानक शहाणपण सुचतंय का? भाजपाचं एकच धोरण आहे वापरा आणि सोडून द्या. निवडणूक आली की समाजात तेढ निर्माण करायची, नको ती प्रकरणं बाहेर काढायची आणि सत्तेत असल्याचा गैरफायदा घ्यायचा.”
“एवढंच वाटत होतं, तर तीन वर्षांपूर्वीच मुख्यमंत्र्यांकडे जायला हवं होतं. प्रदेशाध्यक्षांनी अशा बालिश वक्तव्यांपासून दूर राहिलं पाहिजे,” असा सल्लाही त्यांनी दिला.
प्रवीण दरेकर यांनाही उद्देशून त्या म्हणाल्या की, “ही चौकट आधी मोडली कोणी? भाजपचे केंद्रीय मंत्री मुरलीधर मोहोळ आधी बोलले, आमच्यावर आरोप केले, त्यामुळे आम्हीही त्यांना जशास तसं उत्तर दिलं, इतकंच.”
महापालिका निवडणुकीच्या पार्श्वभूमीवर पुण्यातील राजकारण आता आणखी तापण्याची चिन्हं दिसत आहेत.
