Politics : राज्यात स्थानिक स्वराज्य संस्थांच्या निवडणुकांमुळे राजकीय वातावरण चांगलेच तापले आहे. नगरपालिका, नगरपंचायत आणि महानगरपालिकांच्या निवडणुका पार पडल्यानंतर आता राज्याचे लक्ष थेट जिल्हा परिषद निवडणुकांकडे लागले आहे. महानगरपालिका निवडणुकांमध्ये अपेक्षित यश न मिळाल्याने उपमुख्यमंत्री अजित पवार यांनी आता ग्रामीण राजकारणावर लक्ष केंद्रित केले असून, त्याची सुरुवात पुणे जिल्ह्यातून झाल्याचे चित्र आहे. (Ajit Pawar)
पुणे जिल्ह्यात भाजपला मोठा धक्का देत भाजपचे माजी जिल्हाध्यक्ष शरद बुट्टे पाटील यांनी राष्ट्रवादी काँग्रेसमध्ये प्रवेश केला आहे. खेड तालुक्यात अजित पवार यांच्या उपस्थितीत हा पक्षप्रवेश पार पडला. या प्रवेशामुळे आंबेठाण जिल्हा परिषद गटातील राजकीय समीकरणे बदलण्याची शक्यता निर्माण झाली आहे. (Ajit Pawar)
गेल्या आठवड्यात शरद बुट्टे पाटील यांनी दोन वेळा अजित पवारांची भेट घेतली होती. त्यानंतर आज त्यांनी अधिकृतपणे राष्ट्रवादीचा झेंडा हाती घेतला. जिल्हा परिषद निवडणुकांच्या तोंडावर झालेला हा पक्षप्रवेश भाजपसाठी मोठा धक्का मानला जात आहे. (Politics)
पक्षप्रवेशावेळी बोलताना शरद बुट्टे पाटील यांनी आपला राजकीय प्रवास उलगडून सांगितला. “वयाच्या 26व्या वर्षी अजित पवारांनी मला जिल्हा परिषद सभापती पदाची संधी दिली. त्या काळात मी सर्वात तरुण सभापती होतो,” असे त्यांनी सांगितले. पुढे ते म्हणाले, “मी 12 वर्षे भाजपमध्ये काम केले. भामा खोऱ्यात विकासकामे केली. भाजपमधील नेत्यांनीही मला सहकार्य केले. आज पक्ष बदलताना कोणावरही टीका न करता विकासासाठी हा निर्णय घेतला आहे.”
या घडामोडीमुळे जिल्हा परिषद निवडणुकांमध्ये राष्ट्रवादी काँग्रेसला बळ मिळण्याची शक्यता असून, पुणे जिल्ह्यातील ग्रामीण राजकारणात मोठे फेरबदल होण्याचे संकेत मिळत आहेत.
