Navneet rana : अमरावतीच्या भाजप नेत्या आणि माजी खासदार नवनीत राणा यांना पुन्हा एकदा जीवे मारण्याची धमकी मिळाल्याने राज्यातील राजकीय वातावरण तापले आहे. पोलिसांच्या डायल 112 क्रमांकावर अज्ञात व्यक्तीने फोन करून “बाबा सिद्दिकींसारखीच हत्या करू” अशी धमकी दिल्याची माहिती समोर आली आहे. या प्रकरणामुळे नवनीत राणा यांच्या सुरक्षेचा मुद्दा पुन्हा ऐरणीवर आला आहे. (Navneet rana)
ही धमकी साधी घटना नसून, मागील काही महिन्यांपासून सुरू असलेल्या वादग्रस्त राजकीय वक्तव्यांच्या पार्श्वभूमीवर ती अधिक गंभीर मानली जात आहे. काही दिवसांपूर्वी नवनीत राणांनी लोकसंख्या आणि मुलांना जन्म देण्यासंदर्भात केलेल्या वक्तव्यावरून मोठा वाद झाला होता. याच मुद्द्यावरून एमआयएमचे खासदार असदुद्दीन ओवैसी यांनी अमरावती महापालिका निवडणुकीदरम्यान त्यांच्यावर जोरदार टीका केली होती. त्यानंतरच ही धमकी आल्याने अनेक राजकीय तर्क-वितर्क लावले जात आहेत.
महापालिका निवडणुकांमध्ये अमरावतीत भाजप आणि आमदार रवि राणा यांच्या पक्षाला यश मिळाल्यानंतर राणा दाम्पत्य राजकीयदृष्ट्या अधिक सक्रिय झाले आहे. अशा वेळी आलेली ही धमकी केवळ वैयक्तिक नसून राजकीय दबाव निर्माण करण्याचा प्रयत्न असल्याचे बोलले जात आहे.
महत्त्वाचे म्हणजे, नवनीत राणा यांना यापूर्वीही अशाच स्वरूपाच्या धमक्या मिळाल्या आहेत. नोव्हेंबर महिन्यात हैदराबाद येथून पाठवण्यात आलेल्या पत्रांमधून घाणेरड्या भाषेत धमकी देण्यात आली होती. त्या प्रकरणातही पोलिसांत गुन्हा दाखल झाला होता. वारंवार येणाऱ्या धमक्यांमुळे त्यांच्या सुरक्षेबाबत प्रश्नचिन्ह निर्माण झाले आहे.
ही घटना केवळ एका नेत्यापुरती मर्यादित नाही, तर महाराष्ट्रातील राजकीय मतभेद किती टोकाला जात आहेत, याचे हे गंभीर उदाहरण आहे. लोकशाहीत मतभेद असू शकतात, पण धमक्यांच्या भाषेने राजकारण हिंसक वळण घेत असल्याची चिंता व्यक्त केली जात आहे.
