Nagpur News : छातीत तीव्र वेदना आणि श्वास घेण्यास त्रास होत असल्याने सावनेर येथील ७० वर्षीय आजींना हिंगणा रोडवरील लता मंगेशकर हॉस्पिटलमध्ये दाखल करण्यात आले. सुरुवातीला ही केस नेहमीप्रमाणे हृदयविकाराचीच असल्याचे वाटत होते. मात्र काही मिनिटांतच डॉक्टरांच्या लक्षात आले की हा रुग्ण ‘सामान्य’ नसून वैद्यकीय दृष्ट्या अत्यंत दुर्मीळ आणि आव्हानात्मक प्रकरण आहे.
ईसीजीमध्ये हृदयविकाराचे बदल दिसल्यानंतर पुढील तपास सुरू करण्यात आला. हृदयरोगतज्ज्ञ डॉ. हितेंद्र भागवतकर यांनी इको तपासणी करताच एक धक्कादायक बाब समोर आली. हृदय नेहमी ज्या ठिकाणी असते, तिथे ते नव्हतेच. सखोल तपासणीनंतर निष्कर्ष स्पष्ट झाला-या आजींना जन्मजात ‘डेक्स्ट्रोकार्डिया’ ही अवस्था असून त्यांचे हृदय उजव्या बाजूला आहे. विशेष म्हणजे, तब्बल ७० वर्षे ही अवस्था कोणाच्याही लक्षात न येणे हे केवळ भारतातच नव्हे तर जगभरात अत्यंत दुर्मीळ मानले जाते.
अशा स्थितीतही वेळ न दवडता डॉक्टरांनी तातडीने अँजिओग्राफी करण्याचा निर्णय घेतला. मात्र हृदय आणि रक्तवाहिन्यांची संपूर्ण रचना आरशात पाहिल्यासारखी उलटी असल्याने ही प्रक्रिया प्रचंड जोखमीची होती. प्रत्येक रक्तवाहिनी विरुद्ध दिशेने असल्यामुळे अतिशय अचूक नियोजन आणि अनुभवाची गरज होती. अनुभवी वैद्यकीय चमूच्या कौशल्यामुळे अँजिओग्राफी यशस्वी झाली आणि हृदयाच्या मुख्य LAD धमनीत ९० टक्के अडथळा असल्याचे आढळले.
यानंतर काळजीपूर्वक अँजिओप्लास्टी करण्यात आली आणि आजींचे प्राण वाचले. सध्या त्यांची प्रकृती स्थिर असून कोणतीही गुंतागुंत न होता त्यांना घरी सोडण्यात आले आहे. यापूर्वी एका रुग्णालयात त्यांना फक्त हृदयविकाराचा झटका आल्याचे सांगण्यात आले होते, मात्र खरे कारण इतके वेगळे असेल, याची कल्पनाही कुणाला नव्हती.
डॉ. हितेंद्र भागवतकर यांच्या नेतृत्वाखालील लता मंगेशकर हॉस्पिटलच्या हृदयरोग विभागाने आतापर्यंत ७ हजारांहून अधिक निःशुल्क अँजिओप्लास्टी केल्या आहेत. ही केस केवळ एक यशस्वी उपचारकथा नसून, वेळेवर केलेले अचूक निरीक्षण, तज्ज्ञांचे कौशल्य आणि शासकीय आरोग्य योजनांमुळे सामान्य रुग्णांचे प्राण कसे वाचू शकतात, याचे जिवंत उदाहरण ठरली आहे.
