पुणे : पुण्यात PMPML वाहन चालकाने फोनवर बोलत एका हाताने बस पळवल्याचा प्रकार समोर आला आहे. यामुळे नागरिकांच्या आणि पुण्यातील प्रवाशांच्या जीवाशी खेळ सुरुच असल्याचं पुन्हा एकदा उघड झालं आहे. सध्या शहरात चालकाचा फोनवर बोलताना गाडी पळवल्याचा व्हिडीओ व्हायरल झाला आहे.
दरम्यान, मागील काही दिवसांपासून शहरातील पीएमपीएमएल बस चालकाकडून असे प्रकार समोर आले आहेत. यामुळे प्रवाशांच्या जीवाशी खेळ तर सुरु नाही ना? असं प्रश्न नागरिक करत आहेत. अशा बस चालकांच्या वागण्याने अनेक प्रवाशांचा जीव धोक्यात असल्याचं चित्र दिसत आहे. त्यामुळे अशा चालकांवर कडक कारवाई करावी, अशी मागणी जोर धरत आहे.
नेमकं काय घडलं?
पुण्यातील एका पीएमपीएमएल बसचा व्हिडीओ सध्या तुफान व्हायरल होत आहे. त्या व्हिडीओत चालक हा फोनवर बोलत प्रवासी असलेली बस एका हाताने पळवत असल्याचं दिसत आहे. पिंपरी-चिंचवड परिसरातील ही बस असल्याचं व्हिडीओत दिसत आहे. हा व्हिडीओ नेमका कधीचा आहे, यासंदर्भात अजून कोणतीही माहिती मिळाली नाही. मात्र या बसचा MH 14 CH 2155 असा क्रमांक आहे.
