पिंपरी-चिंचवड : रुग्णाला रुग्णालयात घेऊन जाताना आवश्यक ती खबरदारी न घेतल्याचा गंभीर प्रकार पिंपरी-चिंचवडमध्ये समोर आला आहे. यशवंतराव चव्हाण स्मृती रुग्णालयातून (वायसीएम) ससून रुग्णालयाकडे नेण्यात येत असलेला एक ज्येष्ठ नागरिक धावत्या रुग्णवाहिकेतून रस्त्यावर पडला. या घटनेचा व्हिडिओ समाजमाध्यमांवर प्रसारित झाल्यानंतर संबंधित कर्मचाऱ्यांच्या कामकाजावर प्रश्न उपस्थित झाले. या प्रकरणी रुग्णवाहिकेचा चालक अजितकुमार भगत आणि वॉर्डबॉय गजानन ठोंबरे यांच्यावर निलंबनाची कारवाई करण्यात आली आहे.
मिळालेल्या माहितीनुसार, संबंधित वृद्ध व्यक्तीला पुढील उपचारांसाठी वायसीएम रुग्णालयातून ससून रुग्णालयात हलवण्यात येत होते. प्रवासादरम्यान रुग्णवाहिकेचा दरवाजा व्यवस्थित बंद नसल्यामुळे वृद्ध रुग्ण खाली पडल्याचे प्रत्यक्षदर्शींनी सांगितले. रुग्णवाहिकेतून रुग्णाची वाहतूक करताना दरवाजा सुरक्षितपणे बंद आहे की नाही, याची खात्री करणे आवश्यक असते. मात्र, या घटनेत निष्काळजीपणा झाल्याचा आरोप करण्यात येत आहे.
रुग्ण खाली पडल्याचे लक्षात आल्यानंतर काही अंतर पुढे गेलेली रुग्णवाहिका पुन्हा घटनास्थळी परतली. त्यानंतर वृद्ध व्यक्तीला पुन्हा रुग्णवाहिकेत घेऊन पुढील प्रवास सुरू करण्यात आला. या प्रकारामुळे रुग्णांच्या सुरक्षिततेबाबत चिंता व्यक्त करण्यात आली. घटनेची दखल घेत महापालिका प्रशासनाने संबंधित कर्मचाऱ्यांना सुरुवातीला नोटीस बजावली होती. त्यानंतर दोघांनाही निलंबित करण्यात आले.
या घटनेतील आणखी एक महत्त्वाची बाब तपासादरम्यान समोर आली आहे. संबंधित ज्येष्ठ नागरिकाचे नातेवाईक मागील 15 दिवसांपासून त्यांचा शोध घेत होते. मात्र, रुग्णवाहिकेतून वृद्ध व्यक्ती रस्त्यावर पडल्याचा व्हिडिओ समाजमाध्यमांवर प्रसारित झाल्यानंतर त्यांच्या नातेवाइकांचा शोध लागल्याची माहिती समोर आली आहे.
