पिंपरी-चिंचवड : पिंपरी-चिंचवडमधील मोशी परिसरात एका 30 वर्षीय महिलेची हत्या झाल्याची धक्कादायक घटना उघडकीस आली आहे. मंत्रा मोमेंट हाउसिंग कॉम्प्लेक्समधील कमर्शियल ऑफिस परिसरात महिलेचा मृतदेह आढळल्याने परिसरात खळबळ उडाली आहे. या प्रकरणी भोसरी एमआयडीसी पोलिसांनी अज्ञात व्यक्तीविरुद्ध खुनाचा गुन्हा दाखल केला असून आरोपीचा शोध सुरू केला आहे.
मृत महिलेचे नाव प्रियंका आकाश कांबळे (वय 30) असे आहे. पोलिसांच्या प्राथमिक पाहणीत महिलेच्या गळ्यावर गंभीर जखमा आढळल्या. गळा चिरून तिची हत्या करण्यात आल्याचा प्राथमिक अंदाज पोलिसांनी व्यक्त केला आहे. मात्र, हा प्रकार कोणी आणि कोणत्या कारणातून केला, हे अद्याप स्पष्ट झालेले नाही.
ही घटना पहाटेच्या सुमारास उघडकीस आली. पोलिसांच्या नियंत्रण कक्षाला रात्री सुमारे 2 वाजता मोशीतील मंत्रा मोमेंट हाउसिंग कॉम्प्लेक्समधील कमर्शियल ऑफिसच्या शॉप क्रमांक 7 जवळ एका महिलेचा मृतदेह पडल्याची माहिती मिळाली. या माहितीची गंभीर दखल घेत भोसरी एमआयडीसी पोलीस ठाण्याचे पथक तातडीने घटनास्थळी पोहोचले.
पोलिसांनी घटनास्थळाची पाहणी करून तपास सुरू केला. मृत महिलेची ओळख पटवण्यासाठी तांत्रिक विश्लेषणाची मदत घेण्यात आली. त्यानंतर मृतदेह प्रियंका कांबळे यांचा असल्याचे स्पष्ट झाले. या घटनेमुळे मोशी परिसरातील नागरिकांमध्ये भीतीचे वातावरण निर्माण झाले आहे.
या प्रकरणी भारतीय न्याय संहितेच्या (BNS) कलम 103(1) अंतर्गत अज्ञात आरोपीविरोधात हत्येचा गुन्हा नोंदवण्यात आला आहे. भोसरी एमआयडीसी पोलीस ठाण्याचे वरिष्ठ पोलीस निरीक्षक भोजराज मिसाळ या प्रकरणाचा पुढील तपास करत आहेत.
महिलेची हत्या नेमकी कोणत्या कारणातून झाली, घटनेमागे कोणाचा हात आहे आणि आरोपीचा शोध कसा लागणार, या प्रश्नांची उत्तरे तपासातून समोर येण्याची अपेक्षा आहे. आरोपीला शोधण्यासाठी पोलिसांनी तपासाची चक्रे वेगाने फिरवली आहेत.
