तळेगाव दाभाडे, (पिंपरी) : कॉलेजमध्ये शिकणाऱ्या तरुणीचा रस्त्याने पाठलाग करुन तिला अश्लील शिवीगाळ करणाऱ्या एका व्यक्तीला पोलीसांनी अटक केली आहे. ५ जानेवारी ते ८ जानेवारी दरम्यान म्हाळस्करवाडी ते इंद्रायणी कॉलेज रोडवर हा प्रकार घडला. याप्रकरणी पीडित तरुणीने तळेगाव दाभाडे पोलीस ठाण्यात फिर्याद दिली आहे. यावरून पोलिसांनी आरोपी दस्तगीर साहेबखान पठाण (वय-24 रा. रहाटणी मुळ रा. मु.पो. वाडवाना ता. उदगीर जि. लातुर) याच्यावर विनयभंगाचा गुन्हा दाखल केला आहे.
पोलिसांनी दिलेल्या अधिक माहितीनुसार, पीडित तरुणी इंद्रायणी कॉलेजमध्ये शिक्षण घेत आहे. फिर्यादी तरुणी कॉलेजला जाताना आणि येताना आरोपी त्याच्या दुचाकीवरुन पाठलाग करत होता. तसेच फिर्यादी यांचा पाठलाग करुन अश्लील शिवीगाळ देखील केली. कॉलेजला जात असताना ररस्त्यात हात पकडून तिच्या मनास लज्जा उत्पन्न होईल असे वर्तन केले. तसेच ‘तु कुठेही गेली तरी तुला सोडणार नाही, तुला बघून घेतो’ अशी धमकी दिली. पुढील तपास सहायक पोलीस निरीक्षक पाटील करत आहेत.
