पिंपरी: गेल्या काही महिन्यांपासून सुरू असलेल्या कौटुंबिक वादातून एका तरुणावर लोखंडी हातोडीने जीवघेणा हल्ला केल्याची घटना पिंपरीतील बौद्धनगर परिसरात घडली. मंगळवारी, 15 सप्टेंबर रोजी पहाटे 3 च्या सुमारास हा प्रकार घडला. या प्रकरणी पिंपरी पोलिसांनी एका पुरुषासह 2 महिलांना अटक केली आहे.
पोलिसांच्या माहितीनुसार, संबंधित तरुणाच्या चारित्र्यावर त्याच्या पत्नीला संशय होता. या कारणावरून पती-पत्नीमध्ये मागील 6 महिन्यांपासून वारंवार वाद होत असल्याचे समोर आले आहे. या वादातूनच आरोपींनी तरुणावर हल्ला केल्याचा आरोप आहे.
घटनेच्या वेळी परिसरात शांतता असताना आरोपींनी तरुणाला गाठले. सुरुवातीला त्याच्यासोबत शिवीगाळ करत लाथाबुक्क्यांनी मारहाण करण्यात आली. त्यानंतर लोखंडी हातोडीचा वापर करून त्याच्या डोक्यावर, चेहऱ्यावर, छातीवर आणि बरगड्यांवर वार केल्याचे तक्रारीत नमूद आहे. या हल्ल्यात तरुण गंभीर जखमी झाला. घटनेनंतर त्याला तातडीने रुग्णालयात दाखल करण्यात आले असून त्याच्यावर उपचार सुरू आहेत.
या घटनेची माहिती मिळाल्यानंतर पिंपरी पोलिसांनी तपासाला सुरुवात केली. पीडित तरुणाच्या 30 वर्षीय बहिणीने पोलिसांकडे तक्रार दाखल केली. त्यानंतर पोलिसांनी कारवाई करत आकाश अनिल खंडागळे (वय 32, रा. बौद्धनगर, पिंपरी) याच्यासह 50 आणि 28 वर्षांच्या 2 महिलांना अटक केली. दरम्यान, याप्रकरणी अधिक तपास सुरु आहे.
