धाराशिव: धाराशिव शहरात अल्पवयीन मुलीवर लैंगिक अत्याचार झाल्याचा गंभीर प्रकार समोर आला आहे. डान्स शिकवण्याच्या बहाण्याने मुलीला घरी बोलावून तिच्यावर अत्याचार केल्याचा आरोप एका डान्स टीचरवर करण्यात आला आहे. या प्रकरणी पीडित मुलीच्या आईने धाराशिव शहर पोलीस ठाण्यात तक्रार दाखल केली आहे.
पोलिसांनी दिलेल्या माहितीनुसार, 28 ऑगस्ट रोजी दुपारी 12 च्या सुमारास आरोपीने मुलीला डान्स शिकवण्यासाठी आपल्या घरी बोलावले होते. त्यानंतर 12 सप्टेंबरपर्यंतच्या कालावधीत तिला वारंवार घरी बोलावून तिच्यावर अत्याचार केल्याचा आरोप आहे. संबंधित प्रकाराबाबत कुणाला सांगितल्यास गंभीर परिणाम होतील, अशी धमकीही आरोपीने दिल्याचे तक्रारीत नमूद करण्यात आले आहे.
मुलीने सुरुवातीला भीतीमुळे हा प्रकार कुटुंबीयांना सांगितला नव्हता. मात्र, आरोपीकडून होणारा त्रास वाढल्यानंतर तिने अखेर आईला संपूर्ण घटना सांगितली. त्यानंतर कुटुंबीयांनी पोलिसांशी संपर्क साधत तक्रार नोंदवली.
14 सप्टेंबर रोजी पीडितेच्या आईने धाराशिव शहर पोलीस ठाण्यात फिर्याद दिल्यानंतर पोलिसांनी प्रकरणाची नोंद केली. आरोपीविरोधात भारतीय न्याय संहितेतील संबंधित कलमांसह बाल लैंगिक अत्याचारापासून संरक्षण कायदा (POCSO) आणि अनुसूचित जाती-जमाती अत्याचार प्रतिबंधक कायद्यानुसार (अॅट्रॉसिटी) गुन्हा दाखल करण्यात आला असून अधिक तपास सुरु आहे.
