पुणे : येरवडा पोलीस ठाण्याच्या हद्दीत खासगी हॉटेलमधून ऑनलाइन पद्धतीने चालवण्यात येत असलेल्या कथित देहव्यवसायाच्या रॅकेटचा पोलिसांनी पर्दाफाश केला आहे. या कारवाईत दोन आरोपींना अटक करण्यात आली असून, त्यांच्या ताब्यातून दोन महिलांची सुटका करण्यात आली आहे. महिलांना जबरदस्तीने देहव्यवसायात ढकलले जात असल्याचा आरोप पोलिसांकडून करण्यात आला आहे.
राज राजेशाम सविता आणि सुनील शिवाजी शिंदे अशी अटक करण्यात आलेल्या आरोपींची नावे आहेत. पोलिसांना येरवडा परिसरातील एका खासगी हॉटेलमध्ये अशा प्रकारचे रॅकेट सुरू असल्याची माहिती मिळाली होती. त्यानंतर पोलिसांनी बनावट ग्राहकाच्या माध्यमातून आरोपींशी संपर्क साधला. माहितीची खात्री झाल्यानंतर पोलिसांनी सापळा रचून दोन्ही आरोपींना ताब्यात घेतले.
पोलिसांच्या तपासानुसार, आरोपी फोन आणि ऑनलाइन बुकिंगच्या माध्यमातून ग्राहकांशी संपर्क साधत असल्याचा आरोप आहे. ग्राहकांकडून पैसे घेतल्यानंतर महिलांशी त्यांची भेट घडवून आणली जात होती. या प्रकरणात काही महिलांवर देहव्यवसाय करण्यासाठी दबाव टाकला जात असल्याचे तपासात समोर आल्याचे पोलिसांनी सांगितले.
गरजू महिलांना हेरून त्यांना या व्यवसायात आणले जात असल्याचा आरोपही करण्यात आला आहे. त्यानंतर त्यांच्यावर दबाव टाकून देहव्यवसाय करण्यास भाग पाडले जात असल्याचे पोलिसांच्या प्राथमिक तपासात समोर आले आहे. यापूर्वीही आरोपींनी काही महिलांना अशाच प्रकारे जाळ्यात ओढल्याचा संशय असून, त्या अनुषंगाने पोलिसांकडून अधिक तपास केला जात आहे.
या कारवाईदरम्यान पोलिसांनी दोन पीडित महिलांची आरोपींच्या तावडीतून सुटका केली. याप्रकरणी राज सविता आणि सुनील शिंदे यांच्याविरुद्ध येरवडा पोलीस ठाण्यात अनैतिक व्यापार प्रतिबंधक कायद्यानुसार गुन्हा दाखल करण्यात आला आहे. रॅकेटमध्ये आणखी कोणाचा सहभाग आहे का, तसेच अशा प्रकारे आणखी किती महिलांना या व्यवसायात ढकलण्यात आले होते, याचा तपास पोलीस करत आहेत.
