पिंपरी : तरुणीच्या डोळ्यात मिरचीपूड टाकून तसेच मारहाण करीत तिचा दात पाडून चोरट्याने लॅपटॉप व मोबाईल जबरदस्तीने चोरून नेल्याची धक्कादायक घटना घडली आहे. ही घटना गुरुवारी सकाळी पावणेनऊच्या सुमारास आळंदी जवळील मरकळ रोड येथे घडली आहे. याप्रकरणी १९ वर्षीय विद्यार्थिनीने आळंदी पोलिस ठाण्यात फिर्याद दिली आहे. त्यानुसार पोलिसांनी अज्ञात चोरट्याच्या विरोधात गुन्हा दाखल केला आहे.
पोलिसांनी दिलेल्या माहितीनुसार, गुरुवारी सकाळी पावणेनऊच्या सुमारास अज्ञात चोरट्याने फिर्यादी तरुणी हिच्या घराचा दरवाजा वाजविला. तरुणीने दरवाजा उघडला असता आरोपी त्यांच्या घरात घुसला. दरम्यान, त्याने तरुणीच्या डोळ्यात मिरचीपूड टाकली. तोंडावर पंच मारून दात पाडला. त्यानंतर घरातील १० हजार रुपये किंमतीचा लॅपटॉप व दोन हजार रुपये किंमतीचा मोबाईल असा ऐवज जबरदस्तीने चोरून नेला. याप्रकरणी आळंदी पोलिस ठाण्यात तक्रार दाखल केली असून पुढील तपास पोलीस करीत आहेत.
