पिंपरी चिंचवड : पिंपरी चिंचवड शहरातुन एक खळबळजनक बातमी समोर आली आहे. चिंचवड जकात नाका परिसरात रात्रीच्या सुमारास किरकोळ वादातून एका जणाने छातीवर स्क्रू ड्रायव्हरने जोरदार वार केल्याची घटना घडली आहे. यामध्ये रिक्षा चालकाचा जागीच मृत्यू झाल्याची घटना घडली आहे. या घटनेने परिसरात एकच खळबळ उडाली आहे.
याबाबत अधिक माहिती अशी की, पिंपरी चिंचवड शहरात ऑटो रिक्षा चालकाच्या या खुनाचा सीसीटीव्ही फुटेज आता समोर आला आहे. यात रिक्षा चालक व एका व्यक्तीमध्ये वाद सुरु असल्याचे दिसत आहे. त्यांचा वाद मिटविण्यासाठी अन्य एकजण मधे येऊन प्रयत्न करत होता. याच वादात एक व्यक्ती ऑटो रिक्षा चालकावर स्क्रू ड्रायव्हरने वार करताना दिसत आहे. स्क्रू ड्रायव्हरने छातीवर वार केल्यामुळे ऑटो रिक्षा चालकाच्या हृदयावर गंभीर जखम झाल्याने त्याचा जागीच मृत्यू झाला आहे.
किरकोळ वादातून एका व्यक्तीने ऑटो रिक्षा चालकावर स्क्रू ड्रायव्हरने वार करत त्याचा खून केला असल्याचे समोर आले आहे. या घटनेने परिसरात एकच खळबळ उडाली असून रिक्षा चालकाला मारल्यानंतर आरोपी हा घटनास्थळावरून पसार झाला असून या प्रकरणात चिंचवड पोलिस ऑटो रिक्षा चालकावर वार करणाऱ्या आरोपीचा शोध घेत आहेत.
