पिंपरी : भोसरीत गुंडागर्दी, दडपशाही सुरू आहे. धमक्या देऊ नका, आम्ही राजकारणात काय गोट्या खेळण्यास आलो नाही, असा इशारा राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी भोसरीचे आमदार आणि महायुतीचे उमेदवार महेश लांडगे यांना दिला आहे. महाविकास आघाडीच्या (राष्ट्रवादी) पिंपरी-चिंचवडमधील तिन्ही उमेदवारांच्या प्रचारासाठी राष्ट्रवादीचे युवा नेते आणि आमदार रोहित पवार हे आज शहरात आले होते. यावेळी त्यांनी महेश लांडगे यांच्यावर जोरदार हल्लाबोल केला आहे.
काय म्हणाले होते महेश लांडगे?
विरोधकांनी आरोप करताना अक्षरशः पातळी सोडली आहे. माझ्या कार्यकर्त्यांना वाटते की मी विरोधकांच्या आरोपांना उत्तर द्यावे. पण, मी पातळी सोडून बोलणार नाही. मी आरोपांना उत्तर देणार नाही, माझ्याकडे पुरावे आहेत, मी काम मांडत राहणार विरोधकांना त्यांचे उत्तर मिळेल. मात्र, माझ्या कार्यकर्त्यांना कोणी त्रास देणार असेल, तर माझी विरोधकांना विनंती आहे की, माझा मूळ स्वभाव जागा करु नका. १३ दिवसांत निवडणूक होईल. माझ्या एकाही कार्यकर्त्याला त्रास दिला, तर २० तारखेनंतर माझा स्वभाव बदलणार. माझ्या माता-भगिनी आणि कार्यकर्त्यांच्या संरक्षणासाठी मी ‘‘धारकरी’’ आहे, हे लक्षात ठेवा, असा इशारा आमदार महेश लांडगे यांनी दिला होता.
काय म्हणाले रोहित पवार ?
या वक्तव्यालाच रोहित पवार यांनी प्रत्युत्तर दिल आहे. ते म्हणाले, भोसरीमध्ये गुंडागर्दी, दडपशाही आहे. मतदारसंघात ताबा, मलिदा, रिंग गँग झाल्या आहेत. कार्यकर्त्यांना धमक्या दिल्या जात आहेत. व्यवसाय बंद केले जात आहेत. झेंडे, फलक काढले जात आहेत. कार्यकर्त्यांना अडविले जात आहे. चेंबरपासून प्रत्येक कामात शहरात भ्रष्टाचार झाला आहे. महेश लांडगे स्वतःला वारकरी म्हणता तर देवेंद्र फडणवीस यांच्या आदेशानुसार पोलिसांनी वारकऱ्यांवर लाठीमार केला. तेव्हा त्यांना विरोध करण्याची हिम्मत लांडगे यांच्यात होती का? आमदार लांडगे हे दमदाटीशिवाय काहीच बोलत नाहीत, असं रोहित पवार म्हणाले.
पुढे म्हणाले, आम्हाला धमक्या देऊ नका, आम्ही राजकारणात गोट्या खेळण्यास आलो नाही. परिवर्तन करायचे हे भोसरीतील नागरिकांचे ठरलेले आहे. लोकांमध्ये आम्ही जेव्हा चर्चा केली त्यांचे मत आले की येथे लोकप्रतिनिधी नसून ताबा गँग कार्यरत आहे. येथे टक्केवारी मोठ्या प्रमाणात चालते. फक्त स्वतःच्या जवळच्या लोकांना मदत करून ठेके मिळवायचे, त्यातून पैसा मिळवायचा एवढेच कुठेतरी चालू आहे. त्यामुळे परिवर्तन हे नागरिकांनी ठरवले आहे, असंही रोहित पवार म्हणाले.
