पिंपरी-चिंचवड: पिंपरी-चिंचवडमधील मोशी परिसरात (Pune Crime) किरकोळ वादातून एका तरुणाचा खून झाल्याची घटना उघडकीस आली आहे. जेवण बनवण्याच्या कारणावरून झालेल्या वादात संतापलेल्या तरुणाने सिलिंडरची टाकी डोक्यात मारल्याने दुसऱ्या तरुणाचा मृत्यू झाला. ही घटना मोशीतील हवालदार वस्ती येथे घडली असून पोलिसांनी आरोपीला अटक केली आहे. (Pimpri-Chinchwad News)
एमआयडीसी भोसरी पोलीस ठाण्याचे वरिष्ठ पोलीस निरीक्षक गणेश जामदार यांनी दिलेल्या माहितीनुसार, बालाजी मारुती खंडारे (वय 32, रा. हंगरगा, ता. उदगीर, जि. लातूर) असे मृत तरुणाचे नाव आहे. तर या प्रकरणी प्रदीप विठ्ठल गुंडरे (वय 29, रा. आंधोरी, जि. लातूर) याला पोलिसांनी ताब्यात घेतले आहे.
मिळालेल्या माहितीनुसार, बालाजी खंडारे आणि प्रदीप गुंडरे हे एकमेकांचे नातेवाईक असून दोघेही मोशीतील हवालदार वस्ती येथे मजूर म्हणून काम करत होते. ते दोघेही त्याच परिसरात राहत होते. सोमवारी 9 मार्च रोजी रात्री त्यांनी दारू प्यायल्यानंतर जेवण बनवण्याच्या कारणावरून त्यांच्यात वाद झाला.
वाद वाढत गेल्यानंतर दोघांमध्ये जोरदार भांडण झाले. संतापलेल्या प्रदीप गुंडरे याने जवळ असलेली सिलिंडरची टाकी उचलून बालाजी खंडारे यांच्या डोक्यात मारली. या हल्ल्यात बालाजी गंभीर जखमी झाले. त्यांना तातडीने उपचारासाठी नेण्याचा प्रयत्न करण्यात आला, मात्र गंभीर दुखापतीमुळे त्यांचा मृत्यू झाला.
घटनेची माहिती मिळताच एमआयडीसी भोसरी पोलिसांनी घटनास्थळी धाव घेत आरोपी प्रदीप गुंडरे याला अटक केली. या प्रकरणी खुनाचा गुन्हा दाखल करण्यात आला असून पुढील तपास एमआयडीसी भोसरी पोलीस करत आहेत. या घटनेमुळे मोशी परिसरात खळबळ उडाली आहे.
