Pune Crime: पुणे : पुणे जिल्ह्यातील पिंपरी-चिंचवड शहरात किरकोळ कारणांवरून होणाऱ्या वाद आणि हाणामारीच्या घटना सातत्याने वाढत असल्याचे चित्र आहे. निगडीतील त्रिवेणीनगर परिसरात लिफ्ट वापरण्याच्या साध्या कारणावरून झालेल्या वादातून थेट फावड्याने हल्ला केल्याची गंभीर घटना घडली आहे. या हल्ल्यात एका तरुणाला गंभीर दुखापत झाली असून या प्रकरणी निगडी पोलिसांनी एका पुरुषासह एका महिलेविरुद्ध गुन्हा दाखल केला आहे.
या घटनेत जखमी झालेल्या तरुणाचे नाव रामलिंग रावसाहेब सुकळे वय 23, रा. शरदनगर, निगडी असे आहे. रविवारी 21 डिसेंबर रोजी दुपारी सुमारे 4:30 वाजताच्या सुमारास रामलिंग हे त्यांच्या इमारतीतील लिफ्टने खाली जात होते. त्यावेळी त्याच परिसरात राहणारा गणेश गायकवाड याने रामलिंग यांना लिफ्टमध्ये येण्यास मज्जाव केला. तू लिफ्टने का येतोयस असे म्हणत त्याने वाद घालण्यास सुरुवात केली.
सुरुवातीला झालेला शाब्दिक वाद काही वेळातच शिवीगाळ आणि धक्काबुक्कीपर्यंत पोहोचला. रागाच्या भरात गणेश गायकवाड आणि त्याच्यासोबत असलेल्या एका महिलेने रामलिंग यांना मारहाण करण्यास सुरुवात केली. वाद अधिक चिघळल्यानंतर गणेशने जवळच पडलेले फावडे उचलून रामलिंग यांच्यावर वार केले. या हल्ल्यात रामलिंग गंभीर जखमी झाले असून त्यांना तातडीने उपचारासाठी रुग्णालयात दाखल करण्यात आले.
या घटनेनंतर त्रिवेणीनगर परिसरात भीतीचे वातावरण पसरले आहे. पिंपरी-चिंचवड शहरातील निगडी, चिखली आणि आसपासच्या भागात क्षुल्लक कारणांवरून भांडणे आणि हिंसाचाराच्या घटना वाढत असल्याची नागरिकांची तक्रार आहे. सोसायटीतील साधे वाद थेट जीवघेण्या हल्ल्यापर्यंत पोहोचत असल्याने नागरिकांमध्ये चिंता व्यक्त केली जात आहे.
या प्रकरणी निगडी पोलिसांनी संबंधित कलमान्वये गुन्हा दाखल केला असून आरोपींचा शोध सुरू आहे. अशा प्रकारच्या घटनांना आळा घालण्यासाठी परिसरात पोलिस गस्त वाढवावी आणि गुन्हेगारी प्रवृत्तीवर कठोर कारवाई करावी, अशी मागणी स्थानिक नागरिकांकडून होत आहे.
