पिंपरी-चिंचवड : पिंपरी-चिंचवड शहरात सरकारी (Pimpri-Chinchwad Mahapalika) नोकरीच्या आमिषावरून तरुणांची फसवणूक होत असल्याचा गंभीर प्रकार उघडकीस आला आहे. पिंपरी-चिंचवड महानगरपालिका येथे कोणतीही अधिकृत भरती प्रक्रिया सुरू नसताना काही अज्ञात व्यक्तींनी महापालिकेच्या नावाने बनावट नियुक्तिपत्रे देऊन बेरोजगारांना गंडा घातल्याचे समोर आले आहे. (Latest Marathi News)
महापालिका प्रशासनाने स्पष्ट केले आहे की, सध्या कोणत्याही पदांसाठी भरती जाहीर करण्यात आलेली नाही. तरीही बनावट लेटरहेड, शिक्के आणि स्वाक्षऱ्यांचा वापर करून उमेदवारांची निवड झाल्याचे दर्शवणारी पत्रे वितरित करण्यात आली आहेत. या पत्रांमध्ये 1 एप्रिल 2026 रोजी रुजू होण्याची तारीख, 16 हजार रुपये वेतन आणि 16 हजार रुपये महागाई भत्ता असा उल्लेख करण्यात आला आहे. तसेच 3 महिन्यांचा चाचणी कालावधी आणि नोकरी कायमस्वरूपी असल्याचा दावा करण्यात आला आहे.
रुजू होताना शैक्षणिक कागदपत्रे, ओळखपत्र आणि वैद्यकीय प्रमाणपत्र सादर करण्याच्या अटी नमूद केल्यामुळे अनेकांना ही पत्रे खरी असल्याचा भास झाला. काही प्रकरणांत अर्ज प्रक्रिया किंवा कागदपत्र तपासणीच्या नावाखाली पैसे उकळल्याचीही शक्यता व्यक्त केली जात आहे.
शहरात वाढती बेरोजगारी आणि सरकारी नोकरीची ओढ लक्षात घेता एखादे संघटित रॅकेट कार्यरत असण्याची शक्यता नाकारता येत नाही. प्रशासनाने नागरिकांना आवाहन केले आहे की, कोणतीही भरती प्रक्रिया केवळ अधिकृत संकेतस्थळावर किंवा अधिकृत जाहिरातीतूनच जाहीर केली जाते. संशयास्पद नियुक्तिपत्र मिळाल्यास तात्काळ पोलिसांकडे तक्रार करावी.
सरकारी संस्थांच्या नावाने बनावट कागदपत्रे तयार करून फसवणूक करणाऱ्यांविरोधात कठोर कारवाई केली जाईल, असा इशाराही प्रशासनाने दिला आहे. तरुणांनीही नोकरीच्या आमिषाला बळी न पडता माहितीची खातरजमा करूनच पुढील पावले उचलणे आवश्यक आहे.
