पिंपरी-चिंचवड: पिंपरी-चिंचवडमध्ये (Pimpri-Chinchwad Crime) गुंडाविरोधी पथकाने मोठी कारवाई करत रावण टोळीच्या तीन कुख्यात गुन्हेगारांना अटक केली आहे. यातील दोन आरोपी अल्पवयीन आहेत. पोलिसांनी आरोपींकडून चार पिस्तुले, तीन जिवंत काडतुसे आणि एक वापरलेले काडतुस जप्त केले आहे.
अटक करण्यात आलेल्या आरोपींची नावे अनिकेत अशोक बाराथे, अश्विन सुधीर गायकवाड आणि यशपालसिंग अरविंदसिंग देवडा अशी आहेत. पोलिसांनी ही कारवाई सांगवी पोलीस ठाण्याच्या हद्दीत केली असून, आरोपी चिखलीतील पाटील नगर येथे एका ज्वेलर्सच्या दुकानावर दरोडा टाकण्याच्या तयारीत असल्याची माहिती मिळाल्यानंतर गुंडा विरोधी पथकाकडून ही धडक कारवाई करण्यात आली.
गुन्हेगारांपैकी एकाकडे पिस्तुल आढळून आले. पुढील तपास सहाय्यक पोलीस आयुक्त विशाल हिरे यांच्या मार्गदर्शनाखाली गुंडाविरोधी पथकाचे सहाय्यक पोलीस निरीक्षक हरीश माने यांच्या पथकाने केला. आरोपींविरोधात चिखली पोलीस ठाण्यात आर्म्स अॅक्ट अंतर्गत गुन्हा दाखल करण्यात आला असून, न्यायालयाने त्यांना दोन दिवसांची पोलिस कोठडी सुनावली आहे.
सदर कारवाई पोलीस उपायुक्त डॉ. शिवाजी पवार, सहाय्यक पोलीस आयुक्त विशाल हिरे यांच्या मार्गदर्शनाखाली गुंडाविरोधी पथकाचे प्रमुख हरीश माने यांच्या पथकाकडून करण्यात आली आहे.
