पिंपरी-चिंचवड: पिंपरी-चिंचवडच्या मोशी कचरा डेपो नजीक एक हृदयद्रावक दुर्घटना समोर आली आहे. या भागात असलेली एक दुमजली इमारत अचानक पत्त्यांसारखी पत्त्यासारखी कोसळल्याने सर्वत्र खळबळ उडाली आहे. या दुर्दैवी दुर्घटनेत १० ते १४ नागरिक ढिगाऱ्याखाली गाडले गेल्याची भीती व्यक्त होत आहे. अचानक घडलेल्या या घटनेने परिसरातील नागरिकांमध्ये मोठी भीती पसरली आहे.
माहिती मिळताच आसपासच्या लोकांनी मदतीसाठी धाव घेतली आणि काही वेळातच अग्निशमन दल तसेच बचाव पथके घटनास्थळी दाखल झाली. ढिगाऱ्याखाली अडकलेल्या लोकांना जिवंत बाहेर काढण्यासाठी युद्धपातळीवर प्रयत्न केले जात आहेत. जखमींना तातडीने रुग्णालयात हलवण्यासाठी रुग्णवाहिकांचा ताफा घटनास्थळी सज्ज ठेवण्यात आला आहे.
मिळालेल्या माहितीनुसार, इमारत कोसळली त्या वेळी अनेक रहिवासी आतमध्ये होते. प्रत्यक्षदर्शींच्या म्हणण्यानुसार, साधारण १० ते १५ जण ढिगाऱ्यात अडकल्याची दाट शक्यता आहे. अडकलेल्या प्रत्येक व्यक्तीला सुखरूप वाचवणे हे सध्या प्रशासनासमोरचे सर्वात मोठे आणि महत्त्वाचे आव्हान आहे.
ही इमारत का कोसळली आणि हे बांधकाम अधिकृत होते की अनधिकृत, याची माहिती अद्याप समोर आलेली नाही. पोलीस आणि महापालिका प्रशासन घटनास्थळी उपस्थित असून परिस्थितीवर बारकाईने लक्ष ठेवून आहेत.
