PCMC Election 2026 : पिंपरी-चिंचवड : पिंपरी-चिंचवड (Pimpri Chimchwad) महानगरपालिका निवडणुकीच्या धामधुमीत नियमांचे उल्लंघन केल्याचा एक खळबळजनक प्रकार समोर आला असून, प्रशासनाने यावर अतिशय वेगाने कारवाई केली आहे. मतदान केंद्रात मोबाईल नेण्यास बंदी असतानाही एका कार्यकर्त्याने चक्क मतदान करतानाचा फोटो (Photo) सोशल मीडियावर शेअर केला. ही बाब माध्यमांमधून समोर येताच प्रशासन तातडीने कामाला लागले आणि अवघ्या एका तासाच्या आत संबंधित व्यक्तीवर एफआयआर नोंदवण्याचे आदेश देण्यात आले आहेत. या धडक कारवाईमुळे राजकीय वर्तुळात मोठी चर्चा रंगली आहे.
मिळालेल्या माहितीनुसार, भारतीय जनता पक्षाचे कार्यकर्ते नीलेश डोके यांनी मतदान केंद्रातील नियमांचे उल्लंघन केले. त्यांनी मतदान करतानाचा फोटो काढला आणि तो सोशल मीडियावर प्रसिद्ध केला, जे निवडणूक नियमांचे उल्लंघन केल्याचे मानले जाते. या प्रकरणाची दखल घेत पीसीएमसी आयुक्त श्रावण हर्डीकर यांनी स्पष्ट केले की, मतदान केंद्राच्या आत मोबाईल घेऊन जाणे किंवा कोणत्याही प्रकारचे छायाचित्र काढणे हा कायदेशीर गुन्हा आहे. त्यानुसार आता नीलेश डोके यांच्याविरोधात चिंचवड पोलीस ठाण्यात फौजदारी गुन्हा दाखल करण्याची प्रक्रिया सुरू करण्यात आली आहे.
पिंपरी-चिंचवडच्या माजी महापौर अपर्णा डोके यांचे पती नीलेश डोके यांनी फेसबुकवर एक छायाचित्र शेअर केल्यानंतर हा वाद निर्माण झाला. या छायाचित्रात ते मतदान केंद्रात त्यांच्या पत्नीला मतदान करताना दाखवताना आणि मतदारांना पाठिंबा देण्याचे आवाहन करताना दिसत आहेत. नियमांनुसार मतदान केंद्रापासून 100 मीटर अंतरात मोबाईल फोन बाळगण्यास मनाई आहे. या घटनेनंतर नागरिकांकडून तीव्र नाराजी व्यक्त केल्या जात आहेत.
