पिंपरी चिंचवड : पिंपरी चिंचवड शहरातील हिंजवडी पोलिस ठाण्याच्या हद्दीत बावधन येथे एका ज्येष्ठ नागरिक महिलेचा तिच्या राहत्या घरात खून झाल्याची घटना घडली आहे. आशा महेंद्र जैन असे खून झालेल्या महिलेचे नाव आहे. या घटनेत तिचा पती महेंद्र हा देखील गंभीर जखमी झाला आहे. बावधन येथील विंड विल सोसायटी या ठिकाणी मध्यरात्री ही घटना घडली आहे. खून झालेल्या महिलेवर कोयत्याने वार करण्यात आले आहेत.
पाेलिसांनी दिलेल्या अधिक माहितीनूसार, आशा जैन यांचा विंड विल सोसायटीमध्ये बंगला आहे. त्या बंगल्यातील बेडरूम मध्ये त्यांचा मृतदेह आढळून आला. आशा यांच्या गळ्यावर जखम झाली आहे. तसेच त्यांचे पती महेंद्र कुमार जैन हे देखील जखमी असून त्यांच्या गळ्यावर आणि दोन्ही हातावर किरकोळ जखमा झाल्या आहेत.
महेंद्र कुमार जैन यांची मुलगी आणि जावई या दोघांनी त्यांना रुग्णालयात उपचारासाठी दाखल केले. प्रथमदर्शनी जखमी महेंद्र जैन यांनी आपल्या पत्नीसला मारून नंतर स्वतःही आत्महत्या करण्याचा प्रयत्न केल्याचा पोलिसांनी संशय व्यक्त केला आहे. या घटनेतील संशयित म्हणून पाेलिस हे महेंद्र जैन यांची चाैकशी करणार आहेत. ते गंभीर जखमी असल्याने त्यांच्यावर सध्या उपचार सुरु आहेत. जखमी महेंद्र कुमार जैन हे बोलण्याच्या स्थितीत नसल्याने त्यांचा जबाब घेतल्यानंतर पुढील बाबी स्पष्ट होणार आहेत. हिंजवडी पोलिस घटनास्थळी दाखल झाले असून खूनाचा तपास सुरु असल्याची माहिती पाेलिसांनी दिली.
