पिंपरी-चिंचवड: पिंपरी-चिंचवडच्या मोशी येथील इमारत दुर्घटनेनंतर आता कारवाईला वेग आला आहे. या दुर्घटनेत नऊ कामगारांचा मृत्यू झाल्यानंतर पिंपरी-चिंचवड महापालिका प्रशासनाने संबंधित अधिकारी आणि कंत्राटदार कंपनीविरोधात कठोर पावले उचलण्यास सुरुवात केली आहे. जवळपास 81 तास चाललेल्या बचावकार्यानंतर या प्रकरणात सदोष मनुष्यवधाचा गुन्हा दाखल करण्याची प्रक्रिया सुरू करण्यात आली आहे.
महापालिका आयुक्त डॉ. विजय सूर्यवंशी यांनी पर्यावरण विभागाचे प्रमुख संजय कुलकर्णी आणि कार्यकारी अभियंता योगेश आल्हाट यांचा कार्यभार तातडीने काढून घेतला आहे. प्राथमिक चौकशीत त्यांच्या कामकाजात त्रुटी आढळल्याचा संशय व्यक्त करण्यात आला असून त्यांच्यावरही गुन्हा दाखल होण्याची शक्यता आहे.
दुर्घटनाग्रस्त इमारतीच्या वरच्या दोन मजल्यांना आवश्यक पूर्णत्वाचा दाखला नव्हता, अशी बाबही समोर आली आहे. तसेच संबंधित कंत्राटदार कंपनीने इमारतीच्या सुरक्षेसाठी आवश्यक नियमांचे पालन केले होते का आणि बांधकामासाठी आवश्यक परवानग्या घेतल्या होत्या का, याबाबत कंपनीला कारणे दाखवा नोटीस बजावण्यात आली आहे.
दरम्यान, नगरविकास विभागाने या प्रकरणाची सखोल चौकशी करण्यासाठी विभागीय आयुक्त शीतल तेली-उगले यांच्या अध्यक्षतेखाली उच्चस्तरीय समिती स्थापन केली आहे. समितीला एका महिन्यात प्राथमिक अहवाल आणि दोन महिन्यांत अंतिम अहवाल सादर करण्याचे निर्देश देण्यात आले आहेत. या समितीत आपत्ती व्यवस्थापन विभागाव्यतिरिक्त विविध विभागांतील वरिष्ठ अधिकाऱ्यांचा समावेश आहे.
या प्रकरणात कचरा व्यवस्थापनाचे काम करणारी ‘अँटोनी लारा रिन्युएबल’ कंपनी आणि महापालिकेचा पर्यावरण विभाग जबाबदार असल्याचा आरोप सातत्याने केला जात आहे. दरम्यान, खासदार श्रीरंग बारणे यांनीही संबंधित अधिकारी आणि कंपनीविरोधात सदोष मनुष्यवधाचा गुन्हा दाखल करण्याची मागणी केली असून दोषींवर कठोर कारवाई न झाल्यास नगरविकास मंत्र्यांकडे तक्रार करणार असल्याचा इशाराही त्यांनी दिला आहे.
