पिंपरी चिंचवड : पिंपरी चिंचवडच्या रावेतमध्ये ऐन दिवाळीच्या दिवशी एक दुःखद घटना घडली आहे. दिवाळीच्या दिवशी सर्व परिवार आनंदात होता. दिवाळीच्या रात्री आपल्या कुटुंबीयांसोबत फटाके उडवीत असतानाच तरुणावर काळाने घाला घातला. रस्त्यावरून एका भरधाव वेगाने जाणाऱ्या कार चालकाने ३५ वर्षाच्या तरुणाला जोरदार धडक देऊन उडवील्याची घटना समोर आली आहे. या धडकेत तरुणाचा मृत्यू झाला आहे.
याबाबत अधिक माहिती अशी की, दिवाळी असल्याने रात्री सर्वजण फटाके फोडत होते. त्यानुसार पिंपरी चिंचवडच्या रावेत येथील फेलिसिटी सोसायटी समोर सोहम पटेल (वय ३८) हा तरुण आपल्या कुटुंबीयांसोबत फटाके उडवीत असताना एका भरधाव वेगाने जाणाऱ्या चार चाकी वाहन चालकाने त्याला चिरडले. कारचालकाने घटनास्थळावरून पळ काढला आहे. या दुर्देवी अपघाताची घटना सीसीटीव्ही कॅमेरामध्ये कैद झाली आहेत. दिवाळी सारख्या आनंददायी सणाच्या दिवशी पटेल कुटुंबीयवर दुःखाचा डोंगर कोसळला आहे. परिसरात हळहळ व्यक्त केली जात आहे.
कार चालक फरार..
यामध्ये धक्कादायक बाब म्हणजे हा अपघात होऊन जवळपास ४८ तास उलटून गेल्यानंतरही या अपघातातील आरोपी कारचालक अद्यापही पोलिसांच्या हाती लागला नसल्याने रावेत परिसरातील नागरिक संताप व्यक्त करत आहेत. रावेत पोलिसांनी अपघाताला कारणीभूत ठरलेल्या वाहन चालकाला तात्काळ अटक केली नाही; तर आम्ही रस्त्यावर उतरून आंदोलन करू असा इशारा रावेत परिसरातील नागरिकांकडून देण्यात आला आहे.
