पिंपरी: झटपट आणि मोठा पैसा कमावण्याच्या हव्यासापोटी तरुणांकडून गुन्हेगारीचा मार्ग स्वीकारला जात असल्याच्या घटना समोर येत आहेत. पुण्यातही अशीच धक्कादायक घटना उघडकीस आली आहे. शेअर बाजारात गुंतवणूक करून मोठा नफा मिळवून देण्याचे आमिष दाखवत एका ज्येष्ठ नागरिकाची तब्बल ६६ लाख रुपयांची फसवणूक करण्यात आली. या प्रकरणाचा तपास करत पिंपरी-चिंचवड सायबर पोलिसांनी दोघांना अटक केली आहे. विशेष म्हणजे, या प्रकरणातील मुख्य सूत्रधार अविनाश बाकलीकर हा BAMSच्या शेवटच्या वर्षात शिक्षण घेत असल्याचे समोर आले आहे.
पोलिसांनी अविनाश ज्ञानोबा बाकलीकर (वय २८, रा. लातूर) आणि तेजस ज्ञानोबा लोखंडे (वय २४, रा. मरकळगाव) यांना अटक केली आहे. ज्येष्ठ नागरिकाने तक्रार दाखल केल्यानंतर पोलिसांनी संशयित बँक खात्यांचा तपास सुरू केला. या तपासात तेजस लोखंडे याचे नाव समोर आले. त्याला चौकशीसाठी ताब्यात घेतल्यानंतर त्याचा हिंजवडी पोलिस ठाण्याच्या हद्दीतील अपहरण आणि खंडणीच्या गुन्ह्यातही सहभाग असल्याचे निष्पन्न झाले. त्याच्या बँक खात्यात पाच लाख रुपये आढळून आले.
हिंजवडीतील गुन्ह्याप्रकरणी लोखंडे येरवडा मध्यवर्ती कारागृहात न्यायालयीन कोठडीत असताना त्याची अविनाश बाकलीकरशी ओळख झाली. कारागृहातून बाहेर आल्यानंतर दोघांनी संपर्क कायम ठेवला. बाकलीकरने इतर आरोपींशीही संपर्क वाढवला होता. त्याने संबंधितांचे मोबाईल क्रमांक ‘युनिव्हर्सिटी’ या नावाने सेव्ह केल्याचे तपासात समोर आले आहे.
यानंतर दोघांनी मिळून सायबर गुन्ह्यांमध्ये वापरण्यासाठी बोगस बँक खाती उपलब्ध करून देण्याचे जाळे उभारल्याचा पोलिसांचा संशय आहे. लोखंडेकडून मिळालेल्या माहितीच्या आधारे पोलिसांनी लातूर येथून अविनाश बाकलीकरला अटक केली.
तपासात आणखी एक धक्कादायक बाब समोर आली आहे. सायबर फसवणुकीतून मिळालेला पैसा वळवण्यासाठी बाकलीकरने ‘सस्टेनब्लॉक कन्स्ट्रक्शन’ आणि ‘स्टुनोव्हा’ या नावांनी बोगस कार्यालये सुरू केल्याचे पोलिस तपासात निष्पन्न झाले आहे. यापूर्वीही सायबर पोलिसांनी त्याला अटक केली होती.
या टोळीने अशाच प्रकारे आणखी किती जणांची फसवणूक केली आहे, तसेच या प्रकरणात आणखी कोणाचा सहभाग आहे का, याचा तपास पोलिसांकडून सुरू आहे. त्यामुळे सायबर फसवणुकीच्या या प्रकरणाची व्याप्ती आणखी वाढण्याची शक्यता आहे.
