पिंपरी-चिंचवड: पिंपरी-चिंचवडमधील मोशी कचरा डेपो येथे घडलेल्या भीषण दुर्घटनेनंतरही बचावकार्य सुरू असून, ४८ तास उलटल्यानंतरही सात ते आठ कर्मचाऱ्यांचा अद्याप शोध लागलेला नाही. ‘वेस्ट टू एनर्जी’ प्रकल्पाच्या कार्यालयावर हजारो टन कचरा कोसळल्याने तीन मजली इमारत जमीनदोस्त झाली. या दुर्घटनेत एका कर्मचाऱ्याचा मृत्यू झाला असून अनेक जण जखमी झाले आहेत.
घटनेच्या वेळी इमारतीत एकूण १८ कर्मचारी असल्याची माहिती समोर आली आहे. त्यापैकी काहींना सुरक्षित बाहेर काढण्यात यश आले असले, तरी अनेक कर्मचारी अजूनही ढिगाऱ्याखाली अडकले असल्याची भीती व्यक्त केली जात आहे. एनडीआरएफ, अग्निशमन दल आणि स्थानिक प्रशासनाकडून युद्धपातळीवर बचावकार्य सुरू असून, मोठ्या यंत्रसामग्रीच्या सहाय्याने कचऱ्याचा ढिगारा हटवण्याचे प्रयत्न सुरू आहेत.
दुर्घटनेनंतर घटनास्थळी हृदय पिळवटून टाकणारे दृश्य पाहायला मिळत आहे. आपल्या नातेवाईकांच्या प्रतीक्षेत उभ्या असलेल्या कुटुंबीयांचा संयम आता सुटू लागला आहे. एका महिलेने अश्रूंना वाट मोकळी करून दिली, तर एका आईने “माझ्या मुलाला एक तासात बाहेर काढा,” अशी आर्त विनंती करत प्रशासनाकडे धाव घेतली. या प्रसंगाने घटनास्थळी उपस्थितांचेही डोळे पाणावले.
दरम्यान, प्रशासनाकडून बचावकार्य सुरू असल्याचे सांगण्यात येत असून, ढिगाऱ्याखाली अडकलेल्या सर्व कर्मचाऱ्यांचा शोध घेण्यासाठी सर्व यंत्रणा प्रयत्न करत आहेत. मात्र, वेळ जसजसा पुढे जात आहे, तसतसा नातेवाईकांचा आक्रोश आणि चिंता अधिक वाढताना दिसत आहे.
