पिंपरी-चिंचवड: पिंपरी-चिंचवडमध्ये एका खासगी स्कूल व्हॅनला अचानक भीषण आग लागल्याची धक्कादायक घटना समोर आली आहे. काही क्षणांतच आगीने रौद्र रूप धारण केल्याने संपूर्ण व्हॅन जळून खाक झाली. सुदैवाने, आगीची घटना घडली त्यावेळी व्हॅनमध्ये एकही विद्यार्थी नसल्याने मोठी जीवितहानी टळली.
मिळालेल्या माहितीनुसार, आज सकाळी साडेदहा वाजण्याच्या सुमारास ही घटना घडली. व्हॅन चालकाने विद्यार्थ्यांना इंदिरा शाळेत सुरक्षितपणे सोडल्यानंतर वाहन दुरुस्तीसाठी गॅरेजच्या दिशेने जाण्यास सुरुवात केली होती. त्यावेळी चालू व्हॅनमधून अचानक धूर येत असल्याचे चालकाच्या लक्षात आले.
परिस्थितीचे गांभीर्य ओळखून चालकाने तातडीने व्हॅन रस्त्याच्या कडेला थांबवली. मात्र, वाहन थांबवल्यानंतर काही क्षणांतच आगीने संपूर्ण व्हॅनला वेढले. पाहता पाहता आगीने मोठे रूप धारण केले आणि व्हॅन अक्षरशः जळून खाक झाली.
घटनेची माहिती मिळताच अग्निशमन दलाच्या जवानांसह वाकड पोलीस ठाण्याचे पथक घटनास्थळी दाखल झाले. अग्निशमन दलाच्या जवानांनी तातडीने आग विझवण्याचे काम सुरू केले. अथक प्रयत्नांनंतर आगीवर नियंत्रण मिळवण्यात आले.
View this post on Instagram
दरम्यान, विद्यार्थ्यांना आधीच शाळेत सोडण्यात आल्याने मोठा अनर्थ टळला. व्हॅनमध्ये लहान मुले असती तर परिस्थिती गंभीर होण्याची शक्यता होती. मात्र, सुदैवाने या घटनेत कोणतीही जीवितहानी किंवा दुखापत झाल्याची माहिती नाही.
आगीत स्कूल व्हॅनचे मोठे नुकसान झाले असून, ती पूर्णपणे जळून खाक झाली आहे. व्हॅनला आग नेमकी कशामुळे लागली, याचा तपास सुरू आहे. प्राथमिकदृष्ट्या शॉर्टसर्किटचा संशय व्यक्त केला जात असला तरी आगीमागे अन्य कोणते कारण आहे का, याचाही पोलीस आणि संबंधित यंत्रणांकडून तपास केला जात आहे.
