पिंपरी-चिंचवड: पिंपरी-चिंचवडमधील मोशी इमारत दुर्घटनेप्रकरणी महापालिका प्रशासनाने मोठी प्रशासकीय कारवाई केली आहे. या प्रकरणात पर्यावरण विभागाचे प्रमुख संजय कुलकर्णी आणि कार्यकारी अभियंता योगेश आल्हाट यांचे निलंबन करण्यात आले असून दुर्घटनेच्या चौकशीदरम्यान त्यांनी कोणताही हस्तक्षेप करू नये, यासाठी हा निर्णय घेण्यात आला आहे.
महापालिका आयुक्त डॉ. विजय सूर्यवंशी यांनी दोन्ही अधिकाऱ्यांना कारणे दाखवा नोटीस बजावली होती. त्यांच्या उत्तरांचा आढावा घेतल्यानंतर चौकशी पूर्ण होईपर्यंत सहा महिन्यांसाठी निलंबनाची कारवाई करण्यात आली आहे. मोशी येथील कचरा डेपो परिसरात तीन मजली इमारत कोसळून नऊ जणांचा मृत्यू झाला होता, तर अनेक जण जखमी झाले होते. या दुर्घटनेनंतर प्रशासनाच्या भूमिकेवर प्रश्नचिन्ह उपस्थित करण्यात आले होते.
दरम्यान, या प्रकरणात संबंधित कंत्राटदार कंपनी ‘अँथोनी लारा रिन्युएबल एनर्जी’च्या दोन अधिकाऱ्यांविरुद्ध गुन्हा दाखल करण्यात आला आहे. त्यापैकी एका अधिकाऱ्याला अटक करण्यात आली असून दुसरा उपचार घेत असल्याने त्याच्यावरील पुढील कारवाई प्रलंबित आहे.
महापालिका आयुक्तांनी स्पष्ट केले की, सध्या कुलकर्णी आणि आल्हाट यांच्याविरुद्ध सदोष मनुष्यवधाचा गुन्हा दाखल करण्यात आलेला नाही. मात्र, पोलिसांच्या तपासात त्यांच्या निष्काळजीपणाचा किंवा थेट सहभागाचा पुरावा आढळल्यास त्यांच्यावरही कायदेशीर कारवाई होऊ शकते.
दरम्यान, ‘अँथोनी लारा रिन्युएबल एनर्जी’ कंपनीने नोटिशीला दिलेल्या उत्तरात दुर्घटनास्थळी कोसळलेला कचरा हा बायोमायनिंग करणाऱ्या दुसऱ्या कंपनीचा असल्याचा दावा केला आहे. या दाव्याचीही पडताळणी करण्यात येणार असून संबंधित बायोमायनिंग कंपनीची चौकशी करण्याचा निर्णय महापालिकेने घेतला आहे.
मोशी दुर्घटनेमागील नेमकी जबाबदारी निश्चित करण्यासाठी प्रशासकीय आणि पोलिस तपास सुरू असून दोषी आढळणाऱ्यांवर पुढील कायदेशीर कारवाई केली जाणार आहे.
