पिंपरी चिंचवड : येथील नाशिक फाटा जवळ खाजगी ट्रॅव्हल्सला भीषण आग लागल्याची घटना घडली आहे. सुदैवाने ट्रॅव्हल्समध्ये एकही प्रवासी नव्हता, त्यामुळे कोणतीही जीवितहानी झाली नाही. शुक्रवार (ता.14) आज सकाळी सातच्या सुमारास ही घटना घडली आहे. तात्काळ अग्निशमन दलाने येऊन आगीवर नियंत्रण मिळवलं आहे.
या घटनेसंदर्भात मिळालेल्या माहितीनुसार, निगडी येथून भोसरीच्या दिशेने जाणाऱ्या बसला आग लागली. सुदैवाने यात प्रवासी नसल्याने मोठी जीवितहानी टळली आहे. ट्रॅव्हल्स मध्ये दोन चालक होते. त्यापैकी, एक जण ट्रॅव्हलमध्ये झोपला होता. ट्रॅव्हल्सला आग लागल्यानंतर समोरील ट्रॅव्हल्स चालकाने प्रसंगावधान दाखवत त्या व्यक्तीस बाहेर काढले.
यावेळी घटनेच्या ठिकाणी अग्निशमनच्या दोन वाहनांनी तातडीने येऊन आगीवर नियंत्रण मिळवले. तोपर्यंत ट्रॅव्हलच्या पुढील भाग जळून खाक झाला होता. शॉर्टसर्किटमुळे आग लागल्याची माहिती अग्निशमन ने दिली आहे.
