पिंपरी-चिंचवड : शहरात गुन्हेगारीच्या घटना वाढत असतानाच थेरगाव परिसरात पहाटेच्या सुमारास धक्कादायक प्रकार घडला. रुग्णालयाबाहेर पार्क केलेल्या कारच्या काचा फोडणाऱ्या टोळक्याला विरोध करण्यासाठी गेलेल्या व्यापाऱ्याच्या गळ्याला कोयता लावून त्याच्याकडील दीड हजार रुपयांची रोकड लुटण्यात आली. सोमवारी (१० ऑगस्ट) पहाटे तीनच्या सुमारास हा प्रकार घडला.
वैभव आनंदराव नळगिरे (वय २७, रा. थेरगाव) यांनी आपली कार परिसरातील एका रुग्णालयाजवळ पार्क केली होती. पहाटेच्या वेळी काही जण पेव्हर ब्लॉक, विटा आणि कोयत्याच्या साहाय्याने त्यांच्या कारच्या काचा फोडत होते. कार फोडल्याचा आवाज ऐकून वैभव नळगिरे घटनास्थळी गेले. त्यांनी टोळक्याला कारचे नुकसान करण्यापासून रोखण्याचा प्रयत्न केला.
मात्र, विरोध केल्याने आरोपी आक्रमक झाले. नीरज हकीम सोळंके (वय २१) याने हातातील धारदार कोयता थेट वैभव यांच्या गळ्याला लावला. तसेच त्यांना जीवे मारण्याची धमकी दिली. त्याचवेळी त्याचा साथीदार सूरज हकीम सोळंके (वय १९) याने वैभव यांच्या खिशातून जबरदस्तीने दीड हजार रुपयांची रोकड काढून घेतली.
रोकड लुटल्यानंतर दोन्ही आरोपी घटनास्थळावरून पसार झाले. या प्रकारामुळे घाबरलेल्या वैभव यांनी तत्काळ वाकड पोलीस ठाणे गाठून तक्रार दाखल केली. त्यानुसार नीरज सोळंके आणि सूरज सोळंके यांच्याविरोधात गुन्हा दाखल करण्यात आला आहे.
कारच्या काचा फोडण्यापासून सुरुवात झालेला हा प्रकार थेट कोयत्याच्या धाकावर लुटीपर्यंत पोहोचल्याने परिसरात भीतीचे वातावरण निर्माण झाले आहे. या प्रकरणाचा पुढील तपास वाकड पोलीस करत आहेत.
