पिंपरी : दारु पिण्यासाठी पैसे देण्यास नकार दिल्याने ३ जणांनी एका चालकाला कोयत्याने मारहाण करत खिशातील १७०० रुपये जबरदस्तीने काढून घेतल्याचा धक्कादायक प्रकार पुणे- नाशिक रोडवरील भोसरी येथील राजमाता जिजाऊ उड्डाण पुलाखालील पार्कींगमध्ये घडला. याप्रकरणी भोसरी पोलिसांनी दोघांना अटक केली आहे. ही घटना रविवारी 7 जानेवारीलारात्री पावणे आठ वाजण्याच्या सुमारास घडली.
याप्रकरणी निलेश फकिरा काळे (वय-३१ रा. महालक्ष्मी सोसायटी, दिघी मुळ रा. लोहारा ता. पाचोरा, जि. जळगाव) यांनी भोसरी पोलीस ठाण्यात फिर्य़ाद दिली आहे. पोलिसांनी सुनिल जनार्धन सकट (वय-३२ रा. लांडेवाडी भोसरी), दिपक रामकिशन हजारे (वय-२७ रा. विठ्ठलनगर, लांडेवाडी, भोसरी), पवन छगन उजगरे यांच्यावर गुन्हा दाखल करण्यात आला असून दोघांना अटक केली आहे.
पोलिसांनी दिलेल्या अधिक माहितीनुसार, फिर्य़ादी हे चालक आहेत. रविवारी रात्री फिर्यादी आणि त्यांचा मित्र राजमाता जिजाऊ उड्डाण पुलाखाली पार्कींगमध्ये थांबले होते. त्यावेळी त्यांच्या तोंडओळखीचे आरोपी त्यांच्या जवळ आले. सुनील सकट याने त्याच्या हातातील कोयता फिर्यादी यांच्यावर उगारुन दारु पिण्यासाठी पैशांची मागणी केली. मात्र त्यांनी पैसे देण्यास नकार दिला. याच रागातून आरोपींनी काळे यांना मारहाण केली. तर आरोपी सुनील सकट याने हातातील कोयता काळे यांना मारल्याने ते जखमी झाले.
यानंतर आरोपीने काळे यांना शिवीगाळ करुन मारहाण करत शर्टच्या खिशातील १००० रुपये जबरदस्तीने काढून घेतले. तर दिपक हजारे याने फिर्यादी यांना खाली पाडून हाताने मारहाण केली. तर पवन उजगरे याने फिर्यादी यांच्या पँन्टच्या खिशातून ७०० रुपये काढून घेतले. आरोपींनी फिर्य़ादी यांच्या तोंडावर, कानावर आणि पाठीवर हाताने मारहाण केली. यानंतर हातातील कोयते हवेत फिरवून दहशत निर्माण केली. याबाबत पोलिसांनी आरोपींचा शोध घेऊन दोघांना अटक केली.पुढील तपास पोलीस करत आहेत.
