पिंपरी : स्वराज कॉलनीतील पवारनगर येथे दहशत निर्माण करून चोरी, वाहनांची तोडफोड केल्या प्रकरणी पोलीसांनी १२ जणांना अटक केली. शनिवारी रात्री साडेबाराच्या सुमारास ही घटना घडली. सहायक पोलीस निरीक्षक पद्मभूषण गायकवाड तपास करीत आहेत.
पिस्तूल, कोयते हवेत फिरवून दहशत निर्माण केल्यानंतर या टोळक्याने बिअरच्या बाटल्या रस्त्यावर फोडून वाहनांची तोडफोड केली. तिघांकडील रोकड हिसकावली.
पोलिसांनी दिलेल्या माहितीनुसार, संशयित हे वाहनांवरून आले होते. हातामध्ये कोयते, लाकडी दांडकी, बियरच्या बाटल्या, घेऊन बेकायदेशीर एकत्र येऊन ते हवेत फिरवून दहशत निर्माण केली. बियरच्या बाटल्या रस्त्यावर फोडल्या. रस्त्याच्या कडेला उभी असलेली रिक्षा व दुचाकी कोयत्याने फोडून नुकसान केले. फिर्यादी अक्षय केदारी यांच्या खिशातील एक हजार ६०० रुपये, यश सपकाळ याच्या खिशातील एक हजार २०० रुपये व अजय नवले याच्या खिशातील ७०० रुपये, असे एकूण ३हजार ५०० रुपये जबरदस्तीने काढले. तसेच परिसरात दहशत निर्माण केली.
अक्षय विलास केदारी यांनी याप्रकरणी वाकड पोलीस ठाण्यात फिर्याद दिल्यानंतर, कैवल्य दिनेश जाधवर (१९रा. उंद्री, हडपसर), शिवशंकर शामराव जिरगे (२२, रा. दत्तानगर, थेरगाव), सुमित सिद्राम माने (२३, रा. शिवराजनगर, रहाटणी), विराज विजय शिंदे (२०, रा. जनता वसाहत, पर्वती, पुणे), गणेश बबन खारे (२६, रा. दगडू पाटील नगर, थेरगाव), अजय भीम दुधभाते (२२, रा. पडवळनगर, थेरगाव), शुभम चंद्रकांत पांचाळ (२३, रा. काळेवाडी), ऋषिकेश हरी आटोळे (२१, रा. बेलठीकानगर, शिवदर्शन काॅलनी, थेरगाव), रोहित मोहन खताळ (२१, रा. दगडू पाटील नगर, थेरगाव), मुन्ना एकनाथ वैरागर (२१, रा. पवारनगर, थेरगाव), अनिकेत अनिल पवार (२७, रा. पवारनगर, थेरगाव), प्रितम सुनील भोसले (२०, रा. आदर्शनगर, काळेवाडी) अशी अटक केलेल्यांची नावे आहेत.
