अक्षय टेमगिरे
रांजणगाव गणपती (पुणे): शिरुर तालुक्यातील पिंपरखेड येथील राहुल बाबुराव राक्षे या युवकाला दोन जणांनी शिवीगाळ करून दगडाने चेहऱ्यावरती बेदम मारहाण करुन गंभीर जखमी केले आहे. याप्रकरणी शिरुर पोलीस स्टेशनमध्ये दोघांवर गुन्हा दाखल झाला आहे.
याबाबत सविस्तर माहिती अशी की, रविवारी (दि. 21जुलै) रोजी सायंकाळी 5.30 च्या सुमारास काठापुर खुर्द गावच्या जिल्हा परिषद शाळेसमोर सागर विलास उदागे, संजय फकीरा उदागे (दोन्ही रा. पिंपरखेड ता. शिरूर जि. पुणे) हे राहुल राक्षे याला म्हणाले की, तुला खुप मस्ती आली आहे. अशी शिवीगाळ करून तुला कायमस्वरूपी अपंग करतो. अशी धमकी दिले. आणि ते दोघे राहुल राक्षे याच्या अंगावर धाऊन आले.
त्यावेळी सागर उदागे याने राहुल राक्षे याला पाठीमागुन धरून ठेवले व संजय उदागे यांने हातात दगड घेऊन राहुल राक्षेच्या गालावर, नाकावर, भुवईवर मारून दुखापत केली आहे. या प्रकरणी त्या दोघा विरूद्ध राहुल राक्षे याने तक्रार दिल्याने गुन्हा दाखल करण्यात आला आहे. या घटनेचा पुढील तपास शिरुर पोलीस स्टेशनचे पोलीस निरीक्षक ज्योतीराम गुंजवटे यांच्या मार्गदर्शना खाली पो. हवा. भगत हे करत आहे.
