पुणे : बसप्रवासादरम्यान वाहक आणि प्रवाशांत सुट्या पैशांवरून हमखास वाद होतो. ‘प्रत्येकाला देण्यासाठी सुटे पैसे कोठून आणायचे,’ असा त्रागा वाहक करताना दिसतो, तर ‘आमच्याकडे सुटे पैसे नाहीत, आम्ही तरी कोठून देणार’ असा प्रवाशांचा सवाल असतो. यावर तोडगा काढतानाच राज्य मार्ग परिवहन महामंडळाने आता बसमध्येच कॅशलेस व्यवहारांची सुविधा उपलब्ध करून देण्याचा निर्णय घेतला आहे. तुमच्या खिशात पैसे नसतानाही तुम्हाला एसटीने प्रवास करता येणार आहे. एसटीने तिकिटासाठीही ऑनलाइन पेमेंट देण्याची सोय उपलब्ध करुन दिली आहे. यामुळे सुट्या पैशांची कटकट संपणार आहे.
चहाची टपरी असो, पानटपरी, भाजीविक्रेता वा एखादा रिक्षाचालक, आजकाल सगळ्यांच्या मोबाइल फोनमध्ये डिजिटल पेमेंट वॉलेट, यूपीआय असल्यामुळे रोख पैशांची गरज कमी झाली आहे. विविध कंपन्यांच्या ‘यूपीआय’चे क्यूआर कोड स्कॅन करताच व्यावसायिकाला पैसे अदा होतात. मात्र, या तंत्रज्ञानाच्या बाबतीत राज्य परिवहन महामंडळाची वाहतूक सेवा एक पाऊल मागे होती. परंतु, आता ‘एसटी’चे तिकीटही कॅशलेस होणार आहे. महाराष्ट्रात एसटीने प्रवास करणाऱ्यांची संख्या मोठी आहे. राज्य परिवहन महामंडळाकडून राज्यातील प्रत्येक शहरच नाही तर गावही जोडले गेले आहे. ग्रामीण भागातील प्रवाशांना एसटीचा मोठा आधार वाटतो. आता परिवहन महामंडळ काळाप्रमाणे बदलत आहे. नवीन नवीन सुविधा एसटीत दिल्या जात आहेत. नवीन बसेसची खरेदी होत आहे. आता महामंडळ डिजिटल सुद्धा झाले आहे. एसटीने तिकिटासाठीही ऑनलाइन पेमेंट देण्याची सोय उपलब्ध करुन दिली आहे.
एसटी बसमध्ये आता क्यूआर कोडची सुविधा सुरु करण्यात आली आहे. यामुळे ऑनलाईन तिकीट काढून बस प्रवास करता येणार आहे. पुणे विभागात ही सुविधा सुरु झाली आहे. पुणे शहरात यापूर्वीच पीएमपीएमएलने ही सुविधा सुरु केली होती. पुणे विभागात १८ ते २० हजार पेमेंट ऑनलाईनच्या माध्यमातून जमा होऊ लागल्याची माहिती शिवाजीनगर विभागाचे आगार प्रमुख ज्ञानेश्वर रणवरे यांनी दिली. पुणे विभागातील १४ आगारांत ही सुविधा सुरू झाली आहे. आता कार्ड स्वॅप करुन तिकीट देण्याची पद्धत लवकरच सुरु करण्यात येणार आहे. यामुळे प्रवाशी आणि कंडक्टर यांच्यात सुट्या पैशांवरुन होणार वादही टळणार आहे.
