न्हावरे: शिरूर तालुक्यातील राजकीय दृष्ट्या महत्त्वाच्या असलेल्या न्हावरे (Nhaware Gram Panchayat Sarpanch) ग्रामपंचायतीच्या सरपंचपदी संदीप गंगाधर यादव तर उपसरपंचपदी मोहन निवृत्ती सरके यांची सोमवारी (ता.15) दुपारी सर्वानुमते बिनविरोध निवड करण्यात आली.

सुमारे महिनाभरापूर्वी तत्कालीन सरपंच व उपसरपंच यांनी आपापल्या पदाचा राजीनामा दिल्याने दोन्ही पदे रिक्त झाली होती. या पार्श्वभूमीवर आज (ता.15) ग्रामपंचायतीच्या सभागृहात घेण्यात आलेल्या बैठकीत नव्या सरपंच-उपसरपंच निवडीची प्रक्रिया पार पडली.
सरपंच पदासाठी संदीप यादव यांचा एकमेव अर्ज दाखल झाल्याने त्यांची निवड बिनविरोध होणार हे स्पष्ट झाले होते. तर उपसरपंच पदासाठी मोहन सरके व समीर कोरेकर यांनी एकमेकांविरोधात उमेदवारी दाखल केली होती. त्यामुळे मतदानाची शक्यता निर्माण झाली. मात्र, अखेर समीर कोरेकर यांनी आपला उमेदवारी अर्ज मागे घेतल्याने मोहन सरके यांची उपसरपंचपदी सर्वानुमते बिनविरोध निवड झाल्याचे निवडणूक निर्णय अधिकाऱ्यांनी जाहीर केले. निवडणूक निर्णय अधिकारी म्हणून पी.डी.कांबळे यांनी तर सहाय्यक निवडणूक निर्णय अधिकारी म्हणून ग्रामविकास अधिकारी विठ्ठल कर्पे यांनी काम पाहिले.

दरम्यान, सरपंच आणि उपसरपंच निवडीमुळे न्हावरे ग्रामपंचायतीतील स्थानिक राजकारणात नव्या समीकरणांना सुरुवात होणार असून, आगामी काळात गावातील विकासाच्या निर्णयांवर याचा ठसा उमटणार आहे.







