सांगली : सांगलीतून (Sangli) एक धक्कादायक बातमी समोर येत आहे. माधवनगर परिसरात रेल्वेखाली चिरडलेल्या अवस्थेत एका २३ वर्षीय तरुणाचा मृतदेह आढळल्याने (Sangli Tragedy) खळबळ उडाली आहे. अमन दीपक आवळे असे मृत तरुणाचे नाव असून, त्याच्या मृत्यूचे नेमके कारण अद्याप स्पष्ट झालेले नाही.

मिळालेल्या माहितीनुसार, अमन आवळे हा काही दिवसांपासून आजारी होता आणि त्याच्यावर रुग्णालयात उपचार सुरू होते. दोन दिवसांपूर्वी तो रुग्णालयातून पळून घरी आला होता. रविवारी रात्री कुटुंबासोबत जेवण केल्यानंतर तसेच आई-वडिलांशी गप्पा मारल्यानंतर सोमवारी सकाळी तो दुचाकीवरून घराबाहेर पडला.
त्यानंतर काही तासांनंतरचं त्याचा मृतदेह माधवनगर रेल्वे स्टेशनजवळ रेल्वे रुळावर आढळून आला. रेल्वेचे चाक डोक्यावरून गेल्याने त्याची ओळख पटवणे सुरुवातीला कठीण झाले. मात्र, पोलिसांना त्याच्या खिशात सापडलेल्या आधार कार्डच्या झेरॉक्सवरून त्याची ओळख पटवली.

या घटनेची माहिती मिळताच नातेवाईकांनी घटनास्थळी धाव घेतली. पोलिसांनी पंचनामा करून मृतदेह शवविच्छेदनासाठी पाठवले. या गटनेची नोंद पोलिसांनी केली असून, अमनची हत्या झाली की त्याने आत्महत्या केली, याचा तपास सध्या पोलीस करत आहेत. या घटनेची नोंद सांगली ग्रामीण पोलीस ठाण्यात करण्यात आली असून, पुढील तपास सुरू आहे.
दरम्यान, अमनच्या कुटुंबियांनी दिलेल्या माहितीनुसार, अमन हॉस्पिटलमधून घरी आल्यानंतर एकदम हसत-खेळत होता. त्यामुळे तो आत्महत्या सारखे पाऊल उचलणार नाही असं त्याच्या कुटूंबीयांकडून सांगण्यात येत आहे. कुटुंबियांनी दिलेल्या जवाबानंतर अमन सोबत नेमकं काय घडलं असेल? याचा तपास आता पोलीस घेत आहेत.







