Nagar News : कोतवाली, (नगर) : शाळकरी अल्पवयीन मुलीचा पाठलाग करून त्रास देणाऱ्याला कोतवाली पोलिसांनी लोणीकंद (ता. हवेली) परिसरातून अटक केली असल्याची माहिती कोतवाली पोलीस ठाण्याचे वरिष्ठ पोलीस निरीक्षक चंद्रशेखर यादव यांनी दिली आहे.
जीवे मारण्याची धमकी
अक्षय बंडु कुऱ्हाडे (वय २३, रा. अनुसया नगर, कल्याण रोड ता. जि. अनगर, मुळ रा. टाकळी अंबड ता. पैढण, जि. औरंगाबाद) असे आरोपीचे नाव आहे. त्याला न्यायालयाने एका दिवसाची पोलीस कोठडी सुनावली आहे. याप्रकरणी पीडित मुलीच्या वडिलांनी दिलेल्या फिर्यादीवरून कोतवाली पोलीस ठाण्यात विनयभंगसह पोक्सो कलमान्तर्गत गुन्हा दाखल करण्यात आला होता.
पोलिसांनी दिलेल्या माहितीनुसार, पीडित ११ वर्षीय अल्पवयीन मुलीचा आरोपी अक्षय कुऱ्हाडे हा बऱ्याच दिवसांपासून पाठलाग करत होता. शुक्रवारी (ता. १८) आरोपीने अल्पवयीन मुलीला रस्त्यात अडवून तिचा विनयभंग केला. तसेच कोणाला काही सांगितल्यास जीवे मारण्याची धमकी दिली होती. याप्रकरणी तिच्या वडिलांनी फिर्याद दिली होती.
गुन्हा दाखल झाल्यापासून आरोपी पुणे जिल्ह्यातील शिक्रापूर, चाकण, रांजणगाव, तळेगाव या परिसरात ठिकाण बदलून राहत असल्याची माहिती पोलीस निरीक्षक चंद्रशेखर यादव यांना गुप्त बातमीदारामार्फत मिळाली होती. या माहितीच्या आधारे पोलीस निरीक्षक यादव यांनी दोन स्वतंत्र पथके आरोपीच्या शोधासाठी रवाना केली होती. आरोपी हा वाहनावर क्लीनर म्हणून काम करत असल्याची माहिती मिळताच लोणीकंद (पुणे) या ठिकाणावरून कोतवाली पोलिसांनी त्याला ताब्यात घेतले.
सदरची कामगिरी पोलीस निरीक्षक चंद्रशेखर यादव, महिला पोलीस उपनिरीक्षक शितल मुगडे, पोलीस अंमलदार तनवीर शेख, गणेश थोत्रे, योगेश भिंगारदिवे, अब्दुल कादर, इनामदार, संदिप थोरात, अमोल गाढे, याकुब सय्यद, सोमनाथ राऊत, मोबाईल सेलचे नितीन शिंदे, रिंकी माढेकर, ज्योती काळे यांच्या पथकाने ही कारवाई केली आहे. पुढील तपास उपनिरीक्षक शितल मुगडे करीत आहेत.
