पुणे : शहरात केंद्रीय गृहमंत्री अमित शाह यांच्या दौऱ्यानिमित्त आज रविवार (15 नोव्हेंबर) आणि सोमवार (16 नोव्हेंबर) रोजी वाहतुकीत महत्त्वाचे बदल केले गेले आहेत. सुरक्षेच्या कारणास्तव हे पाऊल उचलले असून नागरिकांनी व वाहनचालकांनी पोलिसांच्या नियमांचे पालन करावे, असे आवाहन वाहतूक विभागाचे पोलीस उपायुक्त डॉ. संदीप भाजीभाकरे यांनी केले आहे.
सोमवारी (16 नोव्हेंबर) पुणे जिल्हा परिषद आणि सदाशिव पेठेतील भारत इतिहास संशोधक मंडळ येथे अमित शाह यांचे कार्यक्रम नियोजित आहेत. या पार्श्वभूमीवर सोमवारी सकाळी 7 वाजल्यापासून किराड चौक ते नेहरू मेमोरिअल हॉल चौक हा रस्ता वाहनांसाठी बंद राहणार आहे. या मार्गावरील प्रवाशांनी किराड चौकातून जीपीओ मार्गे हॉटेल ब्ल्यू नाइल चौकात जावे व पुढे आपल्या इच्छित स्थळी मार्गस्थ व्हावे. याशिवाय, जिल्हा परिषद परिसरातील दोराबजी मॉल ते हॉटेल ब्ल्यू नाइल चौक हा मार्गही वाहतुकीस बंद असेल. जिल्हा परिषदेतील कार्यक्रमासाठी येणाऱ्यांनी एसजीएस मॉल, पूना क्लब, लेडीज क्लब, किराड चौक, पोलीस आयुक्तालय परिसरातील गल्ली, इस्कॉन मंदिर आणि ब्ल्यू नाइल चौक या ठिकाणी वाहने उभी करावीत.
तसेच, सदाशिव पेठेतील कार्यक्रमामुळे सोमवारी सकाळी 9 वाजल्यापासून कार्यक्रम संपेपर्यंत टिळक रस्ता, महाराष्ट्र साहित्य परिषद, बादशाही हॉटेल, पेरुगेट पोलीस चौकी ते पावन मारुती मंदिर आणि भरत नाट्य मंदिर भागात वाहने उभी करण्यास बंदी घालण्यात आली आहे.या दोन दिवसांच्या काळात शहरातील इतर प्रमुख रस्त्यांवरही ‘नो पार्किंग’ लागू राहील. यामध्ये लोहगाव हवाई दल तळ ते विमाननगर रस्ता, रामवाडी ते मुंढवा येथील भारत फोर्ज कंपनी, कोरेगाव पार्कमधील नॉर्थ मेन रोड, जहांगीर हॉस्पिटल चौक, इंजिनिअरिंग कॉलेज चौक आणि नेहरू मेमोरिअल चौक यांचा समावेश आहे.
सोबतच जंगली महाराज रस्ता, टिळक चौक, फर्ग्युसन रस्ता (नामदार गोपाळ कृष्ण गोखले रस्ता), वेधशाळा चौक, संचेती चौक, पाटील इस्टेट, संगमवाडी ते येरवड्यातील सादलबाबा चौक, डॉ. बाबासाहेब आंबेडकर चौक ते गोल्फ क्लब रस्ता आणि 509 चौक ते लोहगाव हवाई दल तळ या रस्त्यांवरही सर्व प्रकारची वाहने लावण्यास सक्त मनाई करण्यात आली आहे.
