पिंपरी-चिंचवड: पिंपरी चिंचवड महानगरपालिकेच्या स्थानिक स्वराज्य संस्थांच्या (Muncipal Corporation Election 2025) आगामी निवडणुकांच्या (PCMC News) तयारीला आता वेग आला आहे. महापालिकेच्या कार्यक्षेत्रातील विधानसभा मतदारसंघांची प्रभागनिहाय विभागणी करून तयार केलेली प्रारूप मतदार यादी आज अधिकृतरीत्या जाहीर करण्यात आली. नागरिकांना आपल्या नावांबाबत हरकती किंवा सूचना नोंदवण्यासाठी 20 ते 27 नोव्हेंबर 2025 हा कालावधी देण्यात आला असून ही सुविधा संपूर्ण शहरात उपलब्ध आहे, अशी माहिती आयुक्त आणि प्रशासक श्रावण हर्डीकर यांनी दिली. (Breaking News)
प्रारूप मतदार याद्या प्रभागनिहाय राज्य निवडणूक आयोगाच्या निर्देशानुसार प्रति पृष्ठ रुपये 2 या दराने सावित्रीबाई फुले सभागृहात विक्रीस उपलब्ध असल्याचे निवडणूक विभागाने सांगितले. आयोगाने दिलेल्या वेळापत्रकानुसार 20 नोव्हेंबरला प्रारूप यादी प्रसिद्ध झाली असून 27 नोव्हेंबरपर्यंत हरकती आणि सूचना स्वीकारल्या जातील. 5 डिसेंबर 2025 रोजी हरकतींवरील निर्णय देऊन प्रभागनिहाय अंतिम मतदार याद्या जाहीर केल्या जातील. 8 डिसेंबरला मतदान केंद्रांच्या ठिकाणांची यादी जाहीर होईल आणि 12 डिसेंबर 2025 रोजी मतदान केंद्रनिहाय मतदार याद्या प्रसिद्ध केल्या जातील.
निवडणूक प्रक्रियेत प्रारूप मतदार यादी ही अतिशय महत्त्वाची पायरी असल्याने प्रत्येक मतदाराने आपले नाव योग्य नोंदले आहे का, याची खात्री करणे आणि आवश्यक असल्यास वेळेत हरकती देणे गरजेचे असल्याचे अतिरिक्त आयुक्त विजयकुमार खोराटे यांनी सांगितले. दुसरीकडे पिंपरी चिंचवड महापालिका निवडणुकीच्या तयारीत राष्ट्रवादी काँग्रेसचे दोन्ही गट सक्रिय झाले आहेत. अजित पवार गटाकडून प्रभागनिहाय सर्व्हे सुरू असून 25 नोव्हेंबरपर्यंत इच्छुकांकडून अर्ज मागवले आहेत. अनेक प्रभागांत दोन ते तीन उमेदवार इच्छुक म्हणून पुढे आल्याचे सांगितले जात आहे. तर शरद पवार गटाचे नेते माधव पाटील यांनी वर्ल्ड बँकेकडे कर्जाची मागणी केली असून प्रभाग क्रमांक 17 मधील 30000 महिलांना प्रत्येकी 10001 रुपये देण्यासाठी हे कर्ज आवश्यक असल्याचे सांगितले आहे. महिलांच्या आर्थिक सक्षमीकरणासाठी हा उपक्रम राबवण्याची त्यांची भूमिका असून या मागणीची परिसरात मोठी चर्चा सुरू आहे.
