पुणे : महाराष्ट्र लोकसेवा आयोगातर्फे (MPSC prelims Exam) येत्या रविवारी म्हणजे 28 सप्टेंबर 2025 रोजी होणारी नागरी सेवा राजपत्रित संयुक्त पूर्व परीक्षा अखेर पुढे (Big Breaking) ढकलण्यात आली आहे. राज्यभरात गेल्या काही दिवसांपासून सुरू असलेल्या मुसळधार पावसामुळे मराठवाडा, खानदेश, विदर्भ आणि पश्चिम महाराष्ट्रातील अनेक जिल्ह्यांत पूरस्थिती निर्माण झाली आहे. या पार्श्वभूमीवर उमेदवारांकडून तसेच विविध राजकीय प्रतिनिधींनी परीक्षा पुढे ढकलण्याची मागणी केली होती.
हवामानशास्त्र विभागाने पुढील पाच दिवस राज्यात, विशेषत: मराठवाडा आणि विदर्भातील काही जिल्ह्यांत मुसळधार ते अतिमुसळधार पावसाचा अंदाज व्यक्त केला आहे. विदर्भात तर ऑरेंज अलर्ट जारी करण्यात आला आहे. त्यामुळे आधीच्या पावसामुळेच तयारीत मोठा अडथळा आलेल्या उमेदवारांना आता परीक्षेत बसणे कठीण झाले होते. गेल्या एका आठवड्यापासून पावसाने राज्यात थैमान घातले आहे. या परिस्थितीत परीक्षा घेणे उमेदवारांच्या सुरक्षिततेच्या दृष्टीने अवघड ठरणार असल्याचे निरीक्षण व्यक्त होत होते.
आयोगाने या संपूर्ण परिस्थितीचा आढावा घेतल्यानंतर परीक्षेच्या तारखेबाबत महत्त्वाचा निर्णय घेतला. आयोगाने जाहीर केले की राज्यसेवा पूर्व परीक्षा 28 सप्टेंबर रोजी होणार नाही. आता ही परीक्षा 9 नोव्हेंबर 2025 रोजी होणार आहे. दरम्यान, नव्या तारखेबाबत आयोगाकडून अधिकृत अधिसूचना जारी करण्यात आली असून उमेदवारांनी त्यानुसार तयारी करावी, असे आवाहन करण्यात आले आहे.
या निर्णयामुळे राज्यभरातील हजारो उमेदवारांना दिलासा मिळाला आहे. अनेक उमेदवारांनी गेल्या काही दिवसांपासून सोशल मीडियावर परीक्षा पुढे ढकलण्याची मागणी केली होती. पूरग्रस्त भागातील विद्यार्थी अडचणीत असताना अशा परिस्थितीत परीक्षा घेणे अन्यायकारक ठरले असते, अशी भूमिका मांडली जात होती. अखेर आयोगाने उमेदवारांच्या भावना आणि सुरक्षिततेचा विचार करून परीक्षा पुढे ढकलण्याचा निर्णय घेतला आहे.
राज्यातील पूरस्थिती अद्याप गंभीर असल्याने प्रशासनासमोर मदत, पुनर्वसन आणि बचावकार्य ही मोठी आव्हाने आहेत. या पार्श्वभूमीवर आयोगाचा निर्णय योग्य ठरल्याचे जाणकारांचे मत आहे.
