लोणी काळभोर: कुंजीरवाडी (ता.हवेली) येथील अट्टल गुन्हेगार शुभम धुमाळ याच्यावर एमपीडीए कायद्यांतर्गत कारवाई करण्यात आली होती. कारवाई झाल्यापासून आरोपी पोलिसांना चकवा देत होता. मात्र, लोणी काळभोर पोलिसांनी अखेर आरोपीला आळंदी म्हातोबाची येथे डोंगरामध्ये असलेल्या गवळेश्वर मंदिराच्या परिसरातून आज शुक्रवारी (ता.24) पहाटेच्या सुमारास अटक केली. शुभम संजय धुमाळ (वय 23,रा. धुमाळमळा, कुंजीरवाडी, ता. हवेली) असे अटक करण्यात आलेल्या आरोपीचे नाव आहे.
पोलिसांनी दिलेल्या माहितीनुसार, शुभम धुमाळ हा लोणी काळभोर पोलीस ठाण्यातील रेकॉर्डवरील अट्टल गुन्हेगार आहे. त्याच्यावर पोलिस ठाण्यात खंडणी, जबरी चोरी, दुखापत यासारखे अनेक गंभीर गुन्हे दाखल आहेत. शुभम धुमाळ याचे वाढते गुन्हेगारी स्वरुप लक्षात घेऊन लोणी काळभोर पोलीसांनी त्याला पुणे जिल्ह्यातून तडीपार केले होते. परंतु, शुभम धुमाळ हा तडीपार आदेशाचा भंग करुन वारंवार लोणी काळभोर पोलीस ठाण्याच्या हद्दीत येत होता.
दरम्यान, शुभम धुमाळ याच्यावर कायद्याचा वचक बसावा म्हणून लोणी काळभोर पोलिसांनी महाराष्ट्र झोपडपट्टी, बुटलेगर्स, ड्रग ऑफेन्डर्स आणि डेंजरस पर्सन ऍक्ट (MPDA), 1981 अन्वये कारवाई करण्याचा प्रस्ताव तयार करून पोलिस आयुक्त अमितेश कुमार यांच्याकडे पाठवला होता. या प्रस्तावाला अमितेश कुमार यांनी मान्यता देऊन आरोपी शुभम धुमाळ याच्यावर झोपडपट्टी दादा प्रतिबंधक कायद्याप्रमाणे कारवाई करण्याचे आदेश देण्यात आले होते. त्या अनुषंगाने आरोपी शुभम धुमाळ याच्यावर कारवाई झाली होती.
आरोपी शुभम धुमाळ याच्यावर एमपीडीए अंतर्गत कारवाई करण्याचा प्रस्ताव मंजूर झाल्यापासून तो फरार झाला होता. आरोपीने स्वतः चे अस्तित्व लपवुन कोठेतरी दडून बसला होता. आरोपीने त्याचा मोबाईल व सर्व संपर्काची साधने बंद केल्याने त्याचा ठावठिकाणा लागत नव्हता. फरार कालावधीत त्याच्या हातून पुन्हा गंभीर स्वरुपाचा गुन्हा घडण्याची दाट शक्यता होती. याचे गांभीर्य लक्षात घेऊन लोणी काळभोर पोलिस ठाण्याचे वरिष्ठ पोलीस निरीक्षक राजेंद्र पन्हाळे यांनी आरोपी धुमाळ याला पकडण्यासाठी गुन्हे शाखेचे एक शोध पथक तयार केले होते.
दरम्यान, गुन्हे शाखेचे शोध पथक मागील काही दिवसांपासून आरोपी शुभम धुमाळ याचा शोध घेत होते. पोलिसांनी दिवसरात्र तपास करून आरोपीचा ठावठिकाणा मिळविला. आरोपी धुमाळ याला आळंदी म्हातोबाची (ता.हवेली) येथे डोंगरामध्ये असलेल्या गवळेश्वर मंदिराच्या परिसरातून मोठ्या शिताफीने अटक केली आहे. लोणी काळभोर पोलीसांनी एमपीडीए. प्रस्तावानुसार नाशिक येथील मध्यवर्ती कारागृहात आरोपी शुभम धुमाळ याला १ वर्षासाठी स्थानबध्द केले आहे.
सदरची कामगिरी लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलिस उपनिरीक्षक अनिल जाधव, पोलिस हवालदार गणेश सातपुते, विलास शिंदे,संभाजी देवीकर, सुनील नागलोत, बापू वाघमोडे, तेज भोसले, प्रशांत नरसाळे, मल्हारी ढमढेरे, योगिता भोसुरे, बाजीराव विर, शैलेश कुदळे, योगेश पाटील, चक्रधर शिरगिरे, प्रदीप गाडे, राहुल कर्डीले यांनी केली आहे.
