पुणे : मान्सून मुंबईमध्ये दाखल झाल्यापासून थोड्या अधिक प्रमाणात पावसाची रिमझिम सुरुच आहे. राज्यातही सगळीकडे पावसाने चांगलाच जोर धरल्याचं चित्र आहे. महाराष्ट्रात मान्सून पूर्णपणे व्यापायला अजून दोन दिवस लागणार असल्याचा अंदाज आहे. पुढील चार दिवस राज्यात पावसाची शक्यता कायम आहे. रायगड, पालघर, मुंबई, ठाणे या जिल्ह्यासह कोकणात पुढील 4 दिवस पावसाच्या सरी बरसतील असा अंदाज हवामान विभागाने वर्तवला आहे.

‘या’ जिल्ह्यांना ‘यलो अलर्ट’

भारतीय हवामान विभागाकडून मुंबई, पालघर, ठाणे, रायगड या जिल्ह्यांना पावसाचा यलो अलर्ट देण्यात आला आहे. तसेच पुणे, कोल्हापूर, सातारा, अहमदनगर, सांगली या जिल्ह्यांनाही पावसाचा यलो अलर्ट देण्यात आला आहे. तर सिंधुदुर्ग, रत्नागिरी, सोलापूर या जिल्ह्यांना आयएमडीने पावसाचा ऑरेंज अलर्ट दिला आहे. याशिवाय राज्यभरात पुढील चार दिवस पावसाचा अंदाज कायम असणार आहे.

विजांसह वादळी पावसाची शक्यता

मध्य महाराष्ट्र, कोकण आणि मराठवाड्यातील जिल्ह्यांमध्ये तुरळक ठिकाणी विजांच्या कडकडाटासह वादळ, सोसाट्याचा वारा आणि मुसळधार ते अति मुसळधार पाऊस पडण्याची शक्यता वर्तवली आहे. मराठवाडा , उत्तर मध्य महाराष्ट्र आणि विदर्भातील जिल्ह्यांमध्ये तुरळक ठिकाणी विजांच्या कडकडाटासह वादळ आणि सोसाट्याच्या वाऱ्यासह मध्यम पाऊस पडण्याची शक्यता आहे.

विदर्भात मुसळधार पावसाचा अंदाज

विदर्भातील अनेक जिल्ह्यांना पावसाचा यलो अलर्ट देण्यात आला आहे. चंद्रपूर, गडचिरोली, बुलढाणा, गोंदिय, नागपूर, वर्धा या जिल्ह्यांमध्ये वादळी वारा आणि ढगांच्या गर्जनेसह मुसळधार पावसाचा अंदाज वर्तवण्यात आला आहे. आयएमडीने विदर्भातील काही जिल्ह्यांना पुढील चार दिवसांसाठी यलो अलर्ट दिला आहे. तसेच, नागरिकांनी काळजी घेण्याचं आवाहनही प्रशासनाने केलं आहे.

 

‘या’ जिल्ह्यात जोरदार पावसाच्या सरी

भारतीय हवामान विभागाने वर्तविलेल्या अंदाजानुसार, कोकण आणि मध्य महाराष्ट्रात बहुतेक ठिकाणी तर मराठवाड्यात काही ठिकाणी पावसाची शक्यता आहे. तसेच काही भागात विजांच्या कडकडाटासह पाऊस पडण्याची शक्यता आहे. याशिवाय, पालघर, अहमदनगर, पुणे, सातारा, धाराशिव,लातूर, बीड या जिल्ह्यात जोरदार पावसाच्या सरी कोसळण्याचा अंदाजही हवामान विभागाने वर्तवला आहे.