पुणे : पुणे जिल्ह्यातील जुन्नर तालुक्यातील उंब्रज नं. 2 परिसरात शुक्रवारी सकाळी एक धक्कादायक घटना घडली. एका पिसाळलेल्या कुत्र्याने अचानक उच्छाद मांडत समोर येणाऱ्यांवर जीवघेणा हल्ला चढवला असल्याची माहिती समोर आली आहे . या रक्तरंजित घटनेत 85 वर्षांच्या एका वृद्ध महिला गंभीर जखमी झाल्या असून संपूर्ण भागात भीतीचे वातावरण पसरले आहे.
शुक्रवारी सकाळी आठच्या सुमारास उंब्रज भागात या घटनेची सुरुवात झाली. भटक्या आणि पिसाळलेल्या कुत्र्याने प्रथम परिसरातील 2 ते 3 पाळीव जनावरांवर आणि एका दुसऱ्या कुत्र्यावर हिंसक हल्ला केला. या प्राण्यांना जखमी केल्यानंतर कुत्र्याने रस्त्याने चाललेल्या कुसुम शांताराम हांडे (वय 85) यांच्याकडे धाव घेतली. काही समजण्याच्या आतच या प्राण्याने थेट त्यांच्या चेहऱ्याचा चावा घेतला. या भीषण हल्ल्यामुळे कुसुम हांडे या जागीच रक्ताच्या थारोळ्यात कोसळल्या.
हल्ल्यानंतर गंभीर जखमी झालेल्या कुसुम हांडे यांना स्थानिकांनी तातडीने प्रथम नारायणगाव ग्रामीण रुग्णालयात दाखल केले. तेथून पुढील उपचारासाठी त्यांना मंचर उपजिल्हा रुग्णालयात हलवण्यात आले. मंचर रुग्णालयाचे वैद्यकीय अधिकारी डॉ. संतोष शिंदे यांनी तपासणीनंतर हा ‘कॅटेगरी 3’ प्रकारचा अत्यंत गंभीर हल्ला असल्याचे स्पष्ट केले.
आता महिलेची ढासळती प्रकृती लक्षात घेता त्यांना 108 रुग्णवाहिकेने पुण्यातील ससून सर्वोपचार रुग्णालयात उपचारासाठी रवाना करण्यात आले.त्यांची प्रकृती चिंताजनक असून सध्या ससून रुग्णालयात त्यांच्यावर वैद्यकीय उपचार सुरू आहेत.
या घटनेनंतर उंब्रज आणि आसपासच्या परिसरात नागरिकांमध्ये प्रचंड घबराट पसरली आहे. भटक्या प्राण्यांचा वावर वाढल्याने अशा घटना घडत असल्याचे स्थानिक नागरिकांचे म्हणणे आहे. या पार्श्वभूमीवर परिसरातील नागरिकांनी आणि पादचाऱ्यांनी सतर्कता बाळगावी, तसेच लहान मुले व वृद्धांची विशेष काळजी घ्यावी, असे आवाहन प्रशासनाकडून करण्यात येत आहे.
