मुंबई : मुंबईमध्ये गेल्या दोन दिवसांत आगीच्या दोन मोठ्या दुर्घटना समोर आल्या आहेत. गोरेगाव येथील घटनेनंतर शनिवारी (5 सप्टेंबर) रात्री ग्रँड रोड पूर्व परिसरातील एका गोदामाला भीषण आग लागली. राजेंद्रसूरी आराधना भवन संचालित जिनशासन राजेंद्र चॅरिटेबल ट्रस्टच्या इमारतीत असणाऱ्या मोबाईल ॲक्सेसरीज आणि प्लास्टिकच्या गोदामात रात्री 11.30 च्या सुमारास शॉर्ट सर्किटमुळे ही आग भडकली.
या दुर्घटनेची माहिती मिळताच अग्निशमन दलाने तातडीने घटनास्थळी धाव घेतली. जवानांनी कौशल्याने तत्परता दाखवत इमारतीत अडकलेल्या 8 ते 10 नागरिकांची सुरक्षित सुटका केली. हे गोदाम जुन्या पद्धतीच्या दोन मजली इमारतीत होते, जिथे लाकडाचा मोठ्या प्रमाणावर वापर करण्यात आला होता. प्लास्टिक आणि लाकडामुळे आग वेगाने पसरली आणि संपूर्ण गोदाम जळून खाक झाले.
सुमारे सात तासांच्या अथक प्रयत्नांनंतर आगीवर नियंत्रण मिळवण्यात यश आले. मात्र, अंतर्गत फर्निचर धुमसत राहिल्याने धूर निघत होता, त्यावर अग्निशमन दलाने पुन्हा पाणी मारून आग पूर्णपणे विझवली.याआधी गोरेगाव मेट्रो स्टेशनच्या खाली उभ्या असलेल्या एका बेस्ट बसला अचानक आग लागल्याची दुसरी घटना घडली होती.
बसने पेट घेतल्यानंतर धुराचे प्रचंड लोट पसरले आणि ते मेट्रो स्टेशनच्या आतपर्यंत गेले. धुरामुळे प्रवाशांची गुदमरल्यासारखी अवस्था झाली, ज्यामुळे सर्वांनी स्टेशनबाहेर धाव घेतली आणि परिसरात काही काळ भीतीचे वातावरण निर्माण झाले होते. सुदैवाने दोन्ही घटनांमध्ये कोणतीही जीवितहानी झाली नाही, परंतु मालमत्तेचे मोठे नुकसान झाले आहे.
