पुणे : पुण्यातील येरवडा परिसरात २३ लाखांचा मॅफेड्रॉन अंमली पदार्थ जप्त करण्यात आले आहे. ही कारवाई १५ जानेवारी रोजी करण्यात आली आहे. पुणे ड्रग्ज फ्री या मोहिमेच्या अंतर्गत शहरात मोठ्या प्रमाणावर अंमली पदार्थांची विक्री होत आहे. यावर नियंत्रण ठेवण्याच्या दृष्टीन गुन्हे शाखेतील अंमली पदार्थ विरोधी पथक सातत्याने कारवाई करत असते. अंमली पदार्थाची विक्री करत असलेल्या आरोपींकडून पोलिसांनी २३ लाख ३८ हजार ४०० रुपयांचे मॅफेड्रॉन (एम.डी.) जप्त करण्यात आले आहे.
या प्रकरणी आरोपीला अटक अरण्यात आली आहे. अहमद वाहिद खान (वय-४५, रा. लक्ष्मीनगर, समता मित्र मंडळाजवळ, येरवडा) असे अटक करण्यात आलेल्या आरोपीचे नाव आहे.
पोलिसांनी दिलेल्या माहितीनुसार, अंमली पदार्थ विरोधी पथकाचे पोलीस निरीक्षक सुदर्शन गायकवाड, सहायक पोलीस निरीक्षक नितीनकुमार नाईक तसेच अंमलदार हे बुधवारी येरवडा परिसरात पेट्रोलिंग करीत होते. त्यावेळी पोलीस अंमलदार आझाद पाटील यांना एक बातमी मिळाली. त्या बातमीची खात्री करुन पोलिसांनी अहमद खान याला ताब्यात घेतले आहे.
दरम्यान, त्याच्याकडील बॅगची झडती घेतली. त्यावेळी त्यामध्ये २२ लाख रुपयांचा ११० ग्रॅम मॅफेड्रॉन (एम.डी.) हा अंमली पदार्थ सापडला. तसेच इतर ऐवज असा २३ लाख ३८ हजार ४०० रुपयांचा ऐवज जप्त केला आहे. ही कामगिरी पोलीस आयुक्त अमितेश कुमार, सह पोलीस आयुक्त रंजनकुमार शर्मा, अपर पोलीस आयुक्त शैलेश बलकवडे, सहायक पोलीस आयुक्त राजेंद्र मुळीक यांच्या मार्गदर्शनाखाली अंमली पदार्थ विरोधी पथकाचे पोलीस निरीक्षक सुदर्शना गायकवाड, सहायक पोलीस निरीक्षक नितीनकुमार नाईक, पोलीस अंमलदार आझाद पाटील, साहिल शेख, रवींद्र रोकडे, चेतन गायकवाड, अझिम शेख, संदिप जाधव, दिशा खेवलकर, दिनेश बास्टेवाड, अमोल गायकवाड, विशाल निलख यांनी केली आहे.
