पुणे : पुण्यात दारूवाला पूल परिसरात गादी कारखान्याला आग लागल्याची घटना घडली आहे. सोमवारी (ता. २५) सकाळी अकरा वाजण्याच्या सुमारास गादी कारखान्याला आग लागली. अग्निशमन दलाच्या जवानांना माहिती मिळताच जवानांनी घटनास्थळी धाव घेऊन आग आटोक्यात आणली.
अधिक माहितीनुसार, दारूवाला पूल परिसरात गादी कारखाना आहे. सोमवारी सकाळी अकरा वाजण्याच्या सुमारास गादी कारखान्यात भीषण आग लागली. या आगीत गादी कारखान्यातील कापड तसेच कापसाने पेट घेतल्याने मोठ्या प्रमाणावर धूर झाला. काही वेळातच आग भडकली.
दरम्यान, या घटनेची माहिती मिळताच अग्निशमन दलाच्या जवानांनी घटनास्थळी धाव घेतली. तत्काळ दोन बंब, टँकर घटनास्थळी दाखल झाले. जवानांनी पाण्याचा मारा करुन आग आटोक्यात आणली. आग लागण्याचे कारण अद्याप समजू शकले नाही.
