उरुळी कांचन, (पुणे) : महिलांच्या गळ्यातील सोनसाखळी, मंगळसूत्र हिसकावणाऱ्या दोन सख्ख्या भावांना आणि चोरीचे दागिने विकत घेणाऱ्याला भोसरी पोलिसांनी सापळा रचून ताब्यात घेतले आहे.
अक्षय राजू शेरावत (वय 23), अजय राजू शेरावत (वय 22, दोघे रा. हिंगणगाव, हवेली) अशी अटक केलेल्या आरोपींची नावे आहेत. तर अनिल अंकुश नानावत (वय 39, रा. सणसवाडी, ता. शिरूर) असे चोरीचे दागिने खरेदी करणाऱ्या आरोपीचे नाव आहे. त्यांच्याकडून पोलिसांनी आठ तोळे सोन्याचे दागिने, एक दुचाकी असा 4 लाख 15 हजारांचा ऐवज जप्त करण्यात आला.
पोलिसांनी दिलेल्या माहितीनुसार, भोसरीतील बोऱ्हाडेवाडीतून एका पादचारी महिलेच्या गळ्यातील मंगळसूत्र दुचाकीवरून आलेल्या आरोपींनी हिसकावून नेले होते. याबाबत एमआयडीसी भोसरी पोलीस ठाण्यात गुन्हा दाखल करण्यात आला आहे. त्याचा तपास करत असताना चोरीचे दागिने विकण्यासाठी दोघेजण खडी मशीन रोडवर येणार असल्याची माहिती पोलिसांना मिळाली.
दरम्यान, सापळा रचून अक्षय आणि अजयला ताब्यात घेतले आहे. त्यांच्याकडे चौकशी केली असता त्यांनी गुन्ह्याची कबुली दिली. त्यांच्याकडून चोरीचे दागिने अनिल नानावत याने खरेदी केल्याचे समोर आल्याने पोलिसांनी त्याला देखील अटक केली.
या कारवाईमुळे एमआयडीसी भोसरी पोलीस ठाण्यातील तीन आणि देहूरोड पोलीस ठाण्यातील एक असे चार गुन्हे उघडकीस आले आहेत.
