पुणे: कौटुंबिक वादातून एकाने पेट्रोल अंगावर ओतून पेटवून घेतल्याची घटना येरवड्यातील लूप रोड परिसरात सोमवारी घडली. राज्याचे गृहमंत्री देवेंद्र फडणवीस यांचा ताफा गोल्फ क्लब रस्त्याने जाणार असल्याने मोठा पोलीस बंदोबस्त ठेवण्यात आला होता. तेथे बंदोबस्तावर असलेल्या पोलिसांनी पेटवून घेणाऱ्या व्यक्तीला त्वरित रुग्णालयात दाखल केले.
बबलू माणिक गायकवाड (वय ४०, रा. लक्ष्मीनगर, येरवडा) असे गंभीर भाजलेल्याचे नाव आहे. सोमवारी दुपारी येरवड्यातील लूप रोड परिसरात पीएमपी बस थांब्याजवळ एका व्यक्तीने पेटवून घेतल्याची माहिती पोलीस नियंत्रण कक्षाला मिळाली. त्याचवेळी गृहमंत्री देवेंद्र फडणवीस यांचा ताफा तेथून जाणार होता. त्यामुळे येरवड्यातील गोल्फ क्लब रस्त्यावर पोलीस बंदोबस्त ठेवण्यात आला होता. या घटनेची माहिती मिळताच तेथील पोलिसांनी घटनास्थळी धाव घेतली.
पाेलिसांनी त्वरित बबलू गायकवाड यांना रुग्णालयात दाखल केले. प्राथमिक चौकशी केल्यानंतर कौटुंबिक वादातून गायकवाड यांनी अंगावर पेट्रोल ओतून आत्महत्येचा प्रयत्न केल्याची माहिती मिळाली आहे. गायकवाड यांची प्रकृती चिंताजनक असल्याची माहिती पोलिसांनी दिली आहे.
