पुणे: जवळ बाळगलेली बेकायदेशीर पिस्तूल हाताळताना झालेल्या गोळीबारात एकजण जखमी झाल्याची घटना सिंहगड रोडवरील वडगाव बुद्रुक परिसरात घडली. ही घटना गुरुवारी ११ जुलै रोजी सकाळी घडली आहे. या गोळीबारात एकाच्या पायाला गोळी लागल्याने तो जखमी झाला असून त्याला तातडीने खासगी रुग्णालयात उपचारासाठी दाखल करण्यात आले आहे.
सिंहगड रस्त्यावरील वडगाव बुद्रुक परिसरात चरवड वस्तीत एका किरणा माल दुकानदाराने स्वतः जवळ बेकायदा देशी बनावटीचे पिस्टल बाळगले होते. आज गुरुवारी सकाळी पावणे आठच्या सुमारास किराणा माल दुकानदार आपल्या मित्राला सदर पिस्तूल दाखवत होते. त्यावेळी पिस्तूल हाताळत असताना चाप ओढला गेल्याने त्यामधून गोळी सुटली आणि ती मित्राच्या पायाला चाटून गेली.
दरम्यान गोळीबार झाल्याची माहिती मिळताच सिंहगड रोड पोलीस ठाण्याचे वरिष्ठ पोलीस निरीक्षक विजय कुंभार यांच्यासह पोलीस पथकाने घटनास्थळी धाव घेतली. वरिष्ठ अधिकाऱ्यांनी देखील घटनास्थळी पाहणी केली. या गोळीबाराच्या घटनेत एकाच्या पायाला गोळी चाटून गेली आहे. नेमकी ही घटना कशी घडली, याची माहिती घेण्याचे काम सुरु असल्याची माहिती वरिष्ठ पोलीस निरीक्षक विजय कुंभार यांनी दिली आहे.
