लोणी काळभोर: पुणे-सोलापूर महामार्गाजवळ अज्ञात ट्रकने दिलेल्या धडकेत एका 35 वर्षीय व्यक्तीचा मृत्यू झाला. हा अपघात लोणी काळभोर (ता. हवेली) ग्रामपंचायत हद्दतील माळीमळा परिसरात गुरुवारी (ता.२३) पहाटे तीन वाजण्याच्या सुमारास झाला.
संजय दुंडप्पा वाघमारे (वय 35, रा. माळीमळा, लोणी काळभोर, ता. हवेली, जि. पुणे) असे अपघातात ठार झालेल्या व्यक्तीचे नाव आहे. याप्रकरणी अज्ञात वाहन चालकाच्या विरोधात गुन्हा दाखल करण्यात आला आहे. मिळालेल्या माहितीनुसार, संजय वाघमारे हे पुणे-सोलापूर महामार्गावरून जात असताना भरधाव वेगाने जाणाऱ्या ट्रकने संजयला जोरदार धडक दिली. या अपघातात ते गंभीर जखमी झाले होते.
दरम्यान, या घटनेची माहिती मिळताच लोणी काळभोर पोलीस तातडीने घटनास्थळी दाखल झाले. पोलिसांनी संजय यांना तातडीने एका रुग्णालयात दाखल केले. मात्र, उपचारापूर्वीच डॉक्टरांनी त्यांना मृत घोषित केले.
याप्रकरणी अज्ञात वाहन चालकाच्या विरोधात लोणी काळभोर पोलीस ठाण्यात गुन्हा दाखल करण्यात आला आहे. पुढील तपास सहाय्यक पोलिस निरीक्षक किशोर पवार करत आहेत.
