पुणेः पुण्यामध्ये पुन्हा एकदा हिट अँड रनची धक्कादायक घटना समोर आली आहे. दिवाळीनिमित्त रस्त्यावर फटाके फोडणाऱ्या ३५ वर्षीय व्यक्तीला भरधाव कारने धडक दिली. या भीषण अपघातात त्याचा जागीच मृत्यू झाला आहे. १ नोव्हेंबरला पुण्याच्या पिंपरी-चिंचवडमधील रावेत भागात ही घटना घडली. या घटनेचे सीसीटीव्ही फूटेज आता पुढे आले आहे. महत्त्वाचे म्हणजे अद्यापही पोलिसांनी आरोपींचा शोध न घेतल्याने नागरिकांकडून संताप व्यक्त केला जातो आहे.
सोहम पटेल असे मृत्यू झालेल्या व्यक्तीचे नाव आहे. १ नोव्हेंबरला रात्री तो त्याच्या रावेत येथील फेलीसिटी सोसायटीसमोर फटाके फोडत होता. या वेळी रस्त्याने जाणाऱ्या भरधाव कारने त्याला जोरदार धडक दिली. त्यामुळे तो रस्त्याच्या बाजूला जाऊन पडला. या भीषण अपघातामुळे त्याच्या डोक्याला जबर मार लागला. या अपघातानंतर स्थानिकांनी याची माहिती लगेच पोलिसांना दिली.
तसेच त्याला तत्काळ जवळच्या रुग्णालयात दाखल केले. मात्र, डॉक्टरांनी त्याला मृत घोषित केले. दरम्यान, अद्याप पोलिसांनी वाहनचालकाला शोधून कोणतीही कारवाई केलेली नाही. त्यामुळे आता नागरिकांकडून संताप व्यक्त केला आहे. पुणे पोलिसांनी आरोपीला तत्काळ शोधून अटक करावी, तसेच त्याच्या विरोधात गुन्हा दाखल करावा, अशी मागणी नागरिकांकडून केली जात आहे.
